Песков: Агар нюанслар ҳисобга олинса, Россия ўт очишни тўхтатишга рози

Россиянинг Украинага қарши урушида 30 кунлик ўт очишни тўхтатиш бўйича келишувни «мазмунли муҳокама қилиш» «нюансларни ҳисобга олмасдан туриб» мумкин эмас, деб хабар берди ТАСС 9 май, жума куни президент Владимир Путиннинг матбуот котиби Дмитрий Песковга таяниб.

Песковнинг таъкидлашича, Кремль узоқ муддатли ўт очишни тўхтатиш ташаббусини биринчи марта АҚШ президенти Доналд Трамп томонидан таклиф қилинганида қўллаб-қувватлаган, аммо «ўт очишни тўхтатиш ғояси атрофида жуда кўп нюанслар мавжуд ва уларга жавоб топмасдан туриб, бу ҳақда бирон-бир мазмунли тарзда гапириш жуда қийин».

Кремль вакили апрель ойининг охирида «нюанслар»ни ҳисобга олмасдан туриб, ўт очишни тўхтатиш мумкин эмаслиги ҳақида гапирди.

Украина президенти Володимир Зеленский 7 май кунги мурожаатида Киевнинг Россия билан камида 30 кун давомида ўт очишни тўхтатиш ҳақидаги таклифи ўз кучида қолишини айтди. "Биз дипломатияга имконият бериши мумкин бўлган бу таклифни қайтариб олмаймиз".

Ўша мурожаатида сиёсатчи айнан Россия Украина ҳудудига «янги зарбалардан бошқа ҳеч қандай жавоб» бермаётганини таъкидлади. Бу «уруш манбаси ким эканини ҳар бир кишига имкон қадар аниқ ва равшан кўрсатиб беради», — дея қўшимча қилди Зеленский.