Трамп Киевнинг 30 кунлик сулҳ ғоясини қўллаб-қувватлади

АҚШ президенти Доналд Трамп аввалроқ Украина етакчиси Володимир Зеленский томонидан Кремлга таклиф қилинган 30 кунлик ўт очишни тўхтатиш режасини қўллаб-қувватлашини билдирди. «Агар ўт очишни тўхтатиш келишуви бажарилмаса, Қўшма Штатлар ва унинг ҳамкорлари қўшимча санкциялар жорий қилади», деб ёзди Трамп 8 май, пайшанба куни Truth Social платформасида, афтидан, Россияга мурожаат қилиб.

«Россия ва Украина ўртасида тинчлик ўрнатиш учун европаликлар билан ишлайман ва бу доимий тинчлик бўлади! Бу ўт очишни тўхтатиш охир-оқибатда тинчлик келишувига олиб келиши керак», — деди Оқ уй раҳбари.

7 май куни кечқурун, Кремл томонидан эълон қилинган уч кунлик оташкесим кучга киришидан бир неча соат олдин, Украина президенти Володимир Зеленский барча ҳарбий ҳаракатларни камида 30 кунга тўхтатишни таклиф қилди. Россия бу таклифга жавоб бермади. Путин Ғалаба куни муносабати билан эълон қилган сулҳ 11 май соат 00:00 да тугайди.

Май ойи бошида Bloomberg Трамп жамоаси Россияга иқтисодий босимни кучайтириш учун бир нечта вариантни тайёрлаб қўйгани ҳақида хабар берган эди. Қайд этилишича, президент Владимир Путин Украинага қарши урушни тўхтатишни пайсалга солмоқда.