АҚШда енгил моторли самолёт ҳалокатга учради. Қурбонлар бор

Cessna 550 қалин туман сабаб Сан-Диегодаги турар жой даҳасига қулаб тушди. Ҳодиса жойидаги 15 га яқин уйда ёнғин чиқди.

Фото: AFP

Калифорниянинг Сан-Диего шаҳрида Cessna 550 енгил моторли самолёти турар жой даҳасига қулаб тушиб, кенг кўламли ёнғинни юзага келтирди.

Ҳодиса жойидан эълон қилинган кадрларда ёниб кетган автомобиллар ва вайрон бўлган уйларни кўриш мумкин. Маълум қилинишича, жами 15 тага яқин бинода ёнғин юз берган.

Авиаҳалокат қалин туман сабаб юзага келган. Ҳодиса жойига авиация ёқилғиси тўкилган.

Cessna 550 самолёти Ню-Йорк яқинидаги Тетерборо аэропортида ҳавога кўтарилиб, Канзасда тўхташни амалга оширган ва Сан-Диеогда ҳалокатга учраган.

ABC News телеканали маълумотларига кўра, самолёт бортида бўлган барча ҳалок бўлган. Ҳодиса оқибатида ерда бўлган одамлардан ҳеч кимга жароҳат етмаган. Айнан неча киши ҳалок бўлгани тўғрисида маълумотлар ошкор этилмаган.

BBC’нинг ёзишича, самолётда учувчи билан бирга 8-10 киши бўлган. Ҳаво кемаси қулаган жойдан 100 га яқин одам эвакуация қилинган.

#АҚШ #самолёт