АҚШ Россия ва Киев ўртасида «чопиб юрадиган» воситачи бўлмайди

Вашингтон Россия ва Украина ўртасида тинчлик ўрнатиш бўйича ёндашувини ўзгартирмоқда ва музокараларда воситачилик қилиш учун энди «чопиб юрадиган» воситачи бўлмайди. Бу ҳақда Давлат департаменти матбуот котиби Тэмми Брюс маълум қилди.

Фото: REUTERS

Давлат котиби Марко Рубио АҚШнинг ҳамкорлик формати ўзгаришини очиқ айтди, аммо тинчликка эришиш саъй-ҳаракатларини қўллаб-қувватлаш сақланиб қолмоқда, деди Брюс. Шу билан бирга, Вашингтон Россияга қарши жорий санкцияларни бекор қилишни режалаштирмаяпти, деди Давлат департаменти вакили.

Брюс, шунингдек, можаронинг ҳар икки томонига урушни ўзи тугатиши учун реал қадамларни таклиф қилиш ва ишлаб чиқиш вақти келганини таъкидлади.

Аввалроқ АҚШ давлат котиби Марко Рубио Fox News телеканалига берган интервьюсида Москва ва Киевнинг позициялари бир-биридан анча узоқлигича қолаётганини айтган эди. «Путин бутун Украинани эгаллаб ололмайди, Украина эса Россияни 2014 йилгача бўлган позициясига қайтара олмайди», деди Рубио. Унинг сўзларига кўра, Қўшма Штатлар тинчликка эришиш йўлидаги саъй-ҳаракатлардан воз кечмаяпти, бироқ президент Доналд Трамп тез орада бу масалага қанча вақт ва ресурслар сарфлашга тайёрлигини ҳал қилиши керак.

Рубио Россиянинг Украинага қарши уруши халқаро кун тартибидаги муҳим масала бўлиб қолаётганини, бироқ «Хитой билан содир бўлаётган воқеалар дунё келажаги учун узоқ муддатда муҳимроқ» эканини таъкидлади.

#Россия #АҚШ