Хитой божлардан озод қилинадиган АҚШ товарлари рўйхатини тузди

Пекин 125 фоизлик тарифлардан озод қилинадиган Америка товарлари рўйхатини тайёрлади. Хитой расмийлари бу ҳақда жимгина тегишли компанияларни хабардор қилмоқда, дея хабар берди Reuters.

Фото: Алексей БУЛАТОВ

Хитой 125 фоизлик бож қўлланмайдиган АҚШда ишлаб чиқарилган товарлар рўйхатини тайёрлади ва тегишли компанияларни «жимгина» хабардор қилмоқда. Бу ҳақда Reuters 30 апрель, чоршанба куни икки манбага таянган ҳолда хабар берди.

Америка дори воситаларини сотувчи фармацевтика компаниясида ишлайдиган агентлик манбаларидан бири Хитой расмийлари рўйхат бўйича унинг компанияси билан шахсий алоқага чиққанини айтди. Унинг таъкидлашича, компания бир қатор дори воситаларини ишлаб чиқаришда Америка технологияларидан фойдалангани учун аввалроқ божлардан озод қилишни сўраган.

Бошқа бир манба таъкидлашича, Хитойнинг шарқий минтақасида расмийлар бир гуруҳ хорижий бизнес лоббичиларидан хавфларни баҳолаш учун «тарифлар кескинлиги туфайли юзага келган барча муҳим вазиятлар ҳақида хабар беришни» сўраган. Бундан ташқари, жануби-шарқдаги тўқимачилик ва чип ишлаб чиқарувчиларга АҚШ ва Хитой томонидан жорий қилинган тарифларнинг таъсирини баҳолаш учун сўровнома юборилди.

Ушбу ёндашув АҚШ 145 фоизлик божларни бекор қилмаса, охиригача курашишга тайёрлигини бир неча бор таъкидлаган Пекинга имтиёзларга тайёргарлик кўриш учун амалий қадамлар қўйган ҳолда қатъий жамоатчилик позициясини сақлаб қолиш имконини беради, деб таъкидлайди Reuters.

#Хитой #бож