Италияда миллиардер Майкл Линчнинг чўкиб кетган суперяхтаси сув тубидан олиб чиқилади

Италиялик қутқарувчилар 30 апрел куни чўкиб кетган Bayesian суперяхтасини чиқариб олиш бўйича операция ўтказади, деб хабар берди The Guardian. Қутқарув ишлари 30 миллион долларга баҳоланмоқда.

Британиялик миллиардер Майкл Линчга тегишли бўлган яхта 2024 йил 19 август куни ҳалокатга учраган эди. Ўша вақтда унинг бортида 22 киши бўлган. Ҳалок бўлганлар орасида Майкл Линч, унинг 18 ёшли қизи Ханна ва Morgan Stanley International раиси Жонатан Блумер ҳам бор. Яхта қирғоқдан тахминан 800 метр узоқликда бўлган.

Ўтган йилнинг август ойида Сицилия прокуратураси кеманинг ҳалокатга учрагани юзасидан жиноят иши қўзғатган. Терговчилар яхтани 50 метрли сув тубидан чиқариб олиш иш бўйича кўплаб саволларга жавоб топишга ёрдам беришига умид қилмоқда: ҳалокат инсон омили сабаб юз берганми ёки бунга бошқа омиллар сабаб бўлганми.

Яхта қирғоққа олиб чиқилганидан кейин суд-тиббиёт экспертизаси люклардан бири очиқ бўлган ёки бўлмаганини аниқлайди.

Қиймати 35 миллион евро турадиган 56 метрли Bayesian яхтаси 19 август кечаси Портичелло шаҳри соҳиллари яқинида торнадо оқибатида чўкиб кетганди. Кема ичида Буюк Британияда технология соҳасидаги энг муваффақиятли тадбиркорлардан бири Майкл Линч ҳам бўлган.

Линчни «британиялик Билл Гейтс» деб аташарди. У Буюк Британиядаги энг йирик дастурий таъминотлардан бири Autonomy’ни яратиб, 2011 йилда 11 миллиард долларга HP компаниясига сотишга уринган. Аммо Америка технологик гиганти уни фирибгарликда айблаганидан кейин битим барбод бўлган. Июн ойида у Сан-Франциско суди томонидан барча айбловлардан оқланган эди.