Америкалик аёл ChatGPT ёрдамида ўзида саратон борлигини аниқлади

ChatGPT сунъий интеллект чатботи америкалик аёлга бир нечта шифокорлар хатосидан кейин тўғри ташхис қўйди, деб хабар беради The Sun.

Лорен Бэннон 2024 йил февралдан бери ўз соғлиғидан хавотирланиб келган, бунга жимжилоқ бармоғи эрталаб ва кечқурун букилиши қийинлашиб қолгани сабаб бўлган. Аёл шифокорларга мурожаат қилган, улар эса ревматоид артрит ташхисини қўйган. Шу билан бирга, ушбу касаллик учун топширилган тест жавоблари салбий чиққан.

Бир неча ойдан кейин Лореннинг ошқозонида кучли оғриқ пайдо бўлган — шифокорлар буни кислотали рефлюкция билан боғлаган. Аёл мутахассисларнинг ташхисидан шубҳага бориб, ўзида кузатилаётган касаллик белгиларини ChatGPT’га киритган.

Сунъий интеллект Лоренда Ҳашимото — қалқонсимон безнинг яллиғланиши билан тавсифланган аутоиммун касаллик мавжудлигини дарҳол аниқлаб берган. «Шифокор менда бу касаллик бўлиши мумкин эмаслигини, чунки оиламда бундай ҳолат учрамаганини айтди. Аммо мени шунчаки текшириб кўришларини сўрадим», — дейди аёл.

Ҳашимото касаллигига топширилган тест натижаси ижобий чиққанидан кейин Лорен қалқонсимон безнинг ултратовуш текширувидан ўтган ва шифокорлар унинг бўйнида иккита саратон ўсимтаси борлигини аниқлаган. 2025 йил январда аёл қалқонсимон без ва иккита лимфа тугунини олиб ташлаш бўйича операцияни бошдан ўтказган, шунга қарамай, у ҳамон шифокорлар назоратида қолмоқда.

Лореннинг таъкидлашича, ChatGPT ёрдам бермаганида, Ҳашимото касаллигининг «одатдаги» белгилари кузатилмагани боис саратон ташхиси ҳам қўйилмай қолиб кетиши мумкин эди. «Шифокор омадим чопганини, чунки касаллик эрта аниқланганини айтди. Агар ChatGPT’дан фойдаланмаганида, аниқ биламан, у тарқалиб кетган бўларди», — дея қўшимча қилади аёл.