Қўшимча функционаллар
-
Тунги кўриниш
Путин Украинадаги жанговар ҳаракатларни ҳозирги фронт чизиғи бўйлаб тўхтатишни таклиф қилди — FT
Financial Times’нинг ёзишича, Россия президенти бу таклифни Санкт-Петербургда Трампнинг махсус элчиси Стив Уиткофф билан учрашувда билдирган. Путиннинг матбуот котиби Песков эса буни «фейк» деб атади.
Фото: Kremlin.ru
Россия президенти Владимир Путин Украинадаги жанговар ҳаракатларни ҳозирги фронт чизиғи бўйлаб тўхтатишни таклиф қилди. Бу ҳақда Financial Times ўзининг учта манбасига таяниб хабар берди.
Манбаларнинг айтишича, Путин апрел ойи бошида Санкт-Петербургда Доналд Трампнинг махсус элчиси Стив Уиткофф билан учрашувда Москва Россия томонидан босиб олинган, аммо ҳозирда Киев назоратида қолаётган Украина ҳудудларининг айрим қисмларига даъволардан воз кечиши мумкинлигини билдирган.
Шундан сўнг, АҚШ томони можарони тинч йўл билан ҳал қилиш вариантларини, хусусан, Қримни Россия ҳудуди сифатида тан олиш ҳамда РФ томонидан эгалланган тўртта областнинг айрим қисмларида Москванинг амалдаги назоратини тан олиш каби таклифларни илгари сура бошлаган.
Таъкидланишича, бу уруш бошланганидан буён Путиннинг жанговар ҳаракатларни тўхтатиш учун максималистик талаблардан воз кечишга тайёрлигига ишора қилган илк расмий таклифдир.
Бироқ айрим европалик расмийлар буни шубҳа билан қарши олмоқда. Уларнинг фикрича, Путин бу таклифни Трампни Россиянинг қолган талабларини қабул қилишга ундашда фойдаланиши мумкин. «Ҳозир Киевга айрим позициялардан воз кечиши учун катта босим ўтказиляпти, буларнинг барчаси Трамп ғалаба ҳақида эълон қилиши учун амалга оширилмоқда», — дейди FT манбаларидан бири.
«РИА Новости» Россия президенти матбуот котиби Дмитрий Песковдан Financial Times’да эълон қилинган мақола юзасидан изоҳ сўради. У эса «ҳозирда кўплаб фейклар чоп этилаётганини» билдирди. «Ҳозир фейклар жуда кўп, жумладан, уларни нуфузли нашрлар ҳам эълон қилмоқда, шу боис фақат бирламчи манбаларни эшитиш керак», — дейди у.
23 апрел куни Лондонда АҚШ Украина ва унинг Европадаги иттифоқчилари билан музокаралар ўтказади. The Washington Post’нинг ёзишича, музокаралар давомида АҚШ Қримни Россияга тегишли деб тан олиш ва фронт чизиғини музлатиш тўғрисида таклифларни билдиради. Володимир Зеленский бунга изоҳ бераркан, Украина Қримнинг аннексиясини ҳуқуқий жиҳатдан тан олмаслигини таъкидлади. «Бу бизнинг, Украина халқининг ҳудуди», деди у.
Тинчлик музокаралари
