Индонезияда бомба ҳақида ҳазил қилган аёл рейсдан тушириб қолдирилди

У сумкасида бомба борлигини айтиб, ҳазиллашган. Натижада, самолёт парвози икки соатга кечиккан ва аёл авиакомпаниянинг «қора рўйхати»га киритилган.

Фото: Daily Mail

Индонезияда бомба ҳақида ҳазил қилган кекса аёл рейсдан олинди, деб ёзади Daily Mail. Ҳодиса Жакартадаги Сукарно-Хатта аэропортида юз берди.

Қайд этилишича, йўловчи сумкасида бомба борлигини айтиб, ҳазиллашган. Шундан сўнг, кекса аёл Batik Air авиакомпанияси самолётидан зудлик билан тушуриб қолдирилган.

Воқеа жойидаги кадрларда аёл хотиржамлик билан ўз буюмларини тўплаётгани ва авиация хавфсизлиги ходимлари кузатуви остида бортни тарк этаётгани тасвирланган. У ҳеч қандай қаршилик кўрсатмаган ва ходимларнинг кўрсатмаларига бўйсунган. Бошқа йўловчилар эса қоидабузар фуқаро эвакуация қилинаётганида ўз жойида қолган.

Маълум қилинишича, экипаж стантарт протокол бўйича иш кўрган — учувчилар содир бўлган ҳолатдан хабардор қилинган, хавфсизлик хизмати эса текширувни амалга оширган. Йўловчининг ёнидан хавфли буюмлар топилмаган, аммо у барибир рейсдан олинган.

Самолёт парвози икки соатга кечиккан. Batik Air вакили аёл «таҳдид туғдирадиган баёноти» учун авиакомпаниянинг «қора рўйхати»га киритилганини маълум қилди.

#Индонезия #авиарейс