Кенияда 5 мингта чумолини тўплаган белгиялик ўсмирлар ҳибсга олинди

Кениянинг Накуру округида белгиялик икки ўсмир табиат ресурслари контрабандасида айбланиб, ҳибсга олинди. Euronewsʼнинг ёзишича, улардан пробиркаларга қадоқланган 5 мингта чумоли мусодара қилинган.

Қайд этилишича, Найроби судига олиб борилган 19 ёшли йигитлар чумолиларни шунчаки эрмак учун тўплашгани ва бунинг қонунга зид эканини билмаганликларини айтган. Шу билан бирга, ушбу суд залида параллел равишда чумолилар билан қўлга тушган яна икки эркакка (Кения ва Ветнам фуқаролари) нисбатан ҳам айблов эълон қилинган.

Кения ёввойи табиат муҳофазаси хизматининг (KWS) маълум қилишича, ушбу шахслар Европа ва Осиё бозорлари учун ҳашаротларни ноқонуний етказиб бериш билан шуғулланган.

«Чумолиларнинг ноқонуний экспорти нафақат Кениянинг биологик хилмахиллик бўйича суверен ҳуқуқларига путур етказади, балки маҳаллий ҳамжамиятлар ҳамда тадқиқот институтларини потенциал экологик ва иқтисодий манфаатлардан маҳрум қилади», — дейилади KWS хабарида.

Илгари Кения фил, каркидон ва панголин каби йирик ёввойи ҳайвонларнинг ноқонуний савдосига қарши курашар эди. Бироқ сўнгги тўртта ҳолат савдо тенденциялари ўзгараётгани, яъни йирик сутэмизувчилар ўрнига у қадар эътиборга тушмайдиган, аммо экологик жиҳатдан муҳим турларга ўтилаётганидан далолат бермоқда.

Кения расмийлари белгиялик йигитлардан мусодара қилинган чумолиларни тахминан 7 минг еврога баҳолаган. Уларнинг таъкидлашича, ҳашаротлар қиймати уларнинг тури ва бозордан келиб чиқиб, ўзгариши мумкин.

Найробидаги Африка ёввойи табиати фондининг табиатни муҳофаза қилиш бўйича вице-президенти Филип Мурутининг айтишича, чумолилар тупроқни бойитишда, уруғларнинг униб чиқишида ва қушларни озиқлантиришда муҳим рол ўйнайди. «Агар бундай турларнинг савдоси мавжуд бўлса, уни тартибга солиш керак, ҳеч ким бизнинг ресурсларимизни шунчаки мусодара қилишга ҳақли эмас», — дейди у.

Қўлга олинган тўрт нафар шахс 23 апрелда бўлиб ўтадиган кейинги суд мажлисига қадар ҳибсда сақланади.