АҚШ икки ой ичида Суриядаги қўшинларини босқичма-босқич олиб чиқишни бошлайди

Исроил томони Вашингтоннинг ушбу қарорини ўзгартиришга ҳаракат қилмоқда. Аммо АҚШ бу уринишлар самарасиз эканини билдирган.

Фото: NBC News

АҚШ Исроилни икки ой ичида Суриядаги қўшинларини босқичма-босқич олиб чиқишни режалаштираётгани ҳақида хабардор қилди, деб ёзмоқда Ynet.

Қайд этилишича, Исроил бундай воқеалар ривожининг олдини олишга ҳаракат қилган, бироқ АҚШ бу уринишлар самарасиз бўлганини очиқ айтган. Шу билан бирга, Исроил мудофаа идоралари вакиллари Вашингтон ўз қарорини қайта кўриб чиқиши учун ҳаракат қилишни давом этмоқда.

Юқори мартабали амалдорлардан бирининг журналистларга маълум қилишича, гап АҚШнинг Суриядаги қўшинларини қисман олиб чиқиш ҳақида кетаётган бўлиш мумкин. Унинг сўзларига кўра, Исроил Америка контингентининг Сурияни тарк этиши, Туркияни минтақадаги ўз таъсирини кенгайтиришига ундашидан хавотирда.

АҚШ Мудофаа вазирлиги Суриядаги Америка қўшинларини тўлиқ олиб чиқиб кетиш режасини тайёрлаётгани тўғрисида NBC News телеканали феврал бошларида хабар берганди. Пентагоннинг 2024 йил декабр ойидаги маълумотларига кўра, Сурияда 2 мингга яқин америкалик ҳарбий мавжуд.

АҚШнинг Суриядаги асосий миссияси — ИШИДга қарши туриш ва Вашингтоннинг маҳаллий иттифоқчиларини, жумладан, Сурия демократик кучларини қўллаб-қувватлаш эди.

#Сурия #АҚШ қўшинлари