БААда соҳилга нефт сизиб чиқди: туристлар ўзларини ёмон ҳис қилмоқда

Фужайрада ёқилғи ташувчи кемалардан сизган нефт бир неча меҳмонхона пляжлари яқинида соҳилга чиқиб кетган. Туристлар иссиқ қуёш ва юмшоқ қумлардан баҳра олиш ўрнига ачқимтир қўланса ҳид ва бош оғриғидан шикоят қилмоқда.

Фото: Ижтимоий тармоқлардан

Бирлашган Араб Амирликларининг Фужайра шаҳрида нефт маҳсулотлари денгизга тўкилиши оқибатида, мазут бир нечта меҳмонхона пляжларнинг соҳилларигача сизиб чиққан ва қўланса ҳид ҳатто денгиздан 5 км узоқда ҳам сезилмоқда.

Воқеа рўй берганига 4 кун бўлган. Пляжлар 11 апрелдан бери тозаланмоқда, бироқ ҳамон вазият анча оғирлигича қолмоқда — сўнгги кунларда денгиз соҳилида янги мазут чиқиндилари қайд этилган. Денгиз айрим жойларда қора тусга кирган, қумда эса катта-катта мазут доғлари қолмоқда.

Mash Телеграм каналининг БААда дам олаётган россиялик туристларга асосланиб ёзишича, меҳмонхоналар яқинида денгизда чўмилиш ва соҳилда сайр қилиш имконсиз даражага келиб қолган. «Одатда одам гавжум бўладиган пляжлар бўм-бўш — иссиқ ҳавода мазутнинг ачқимтир ва ёқимсиз ҳиди муаллақ турибди», деган туристлар.

Маълумотларга кўра, денгизни тозалаш учун камида яна бир неча кун талаб этилади. Ҳозирча соҳилга яқинлашган туристлар нафақат кўнгилдагидек дам ололмаётганидан, балки соғлиғига хавф солувчи аломатлардан ҳам азият чекишмоқда: ўнлаб туристлар қайт қилиш, бош оғриғи ва оғизда аччиқ таъмдан шикоят қилган.

Экологик фалокат ҳудудида камида тўртта меҳмонхона бор: Novotel Fujairah, Ibis Fujairah, Al Bahar ва Palace Beach Resort Fujairah. Меҳмонхоналар маъмурияти бу ҳолни «табиий ҳодиса» деб баҳоламоқда ва меҳмонларга ёрдам беришни рад этмоқда — уларга на компенсация тўланган, на тиббий кўрикдан ўтишда ёрдам қилинган. Туристлар ўз ҳисобидан бошқа апартаментларга кўчиб ўтмоқда.

Хабар қилинишича, пляжлар икки ҳафтага ёпилган. Мазут чиқиндиларини ҳамон тозалашга улгуришмаяпти — денгизга яқин жойларга яна янги нефт қуйқалари оқиб келмоқда.

#БАА #нефт #Фужайра #экологик фалокат