Европа ва Канада Путиндан АҚШ таклифига дарҳол жавоб беришни талаб қилмоқда

Украинанинг Европа бўйича иттифоқчилари ва Канада Кремлга мурожаат билан чиқиб, Киев ҳеч қандай шартларсиз қабул қилган АҚШнинг оташкесим тўғрисидаги таклифига дарҳол жавоб беришни талаб қилди.

Фото: Jacquelyn Martin / Reuters

«Россия бугун АҚШга жавоб бериши керак. Бу жавоб ё «ҳа», ё «йўқ» кўринишида бўлиши лозим ва ўз вақтида берилиши шарт», — дея таъкидлади Франция ташқи ишлар вазири Жан-Ноэль Барро НАТОга аъзо давлатлар ташқи ишлар вазирлари Брюсселда ўтказган учрашувда Британия ташқи ишлар вазири Дэвид Лэмми билан биргаликда чиқиш қилиб.

Bloomberg нашрининг ёзишича, Канада ташқи ишлар вазири Мелани Жоли Кремл «яқин вақт ичида аниқ позиция билдириши кераклигини», акс ҳолда оқибатларга дучор бўлиши мумкинлигини таъкидлади. Барро Россия томонидан, аввал келишиб олинган тартибларга қарамасдан, Украина энергетика инфратузилмасига ҳали ҳам зарбалар берилаётганини кескин қоралади.

Иттифоқчилар томонидан жамоатчилик олдида босим ўтказиш орқали Россияни деэскалация борасида амалий қадамларга ундаш кўзда тутилган. Bloomberg таъкидлашича, Вашингтонда Россиянинг узоққа чўзилган музокаралар жараёнидан жиддий ранжиши кучайиб бормоқда.

АҚШ давлат котиби Марко Рубио Брюсселда ўтказилган уч кунлик музокаралар якунида билдиришича, АҚШ «бир неча ҳафта, эмас бир неча ой ичида» Россия тинчликка жиддий тайёрми-йўқми, шунга ойдинлик киритишни истамоқда. Унинг сўзларига кўра, Украина оташкесимга ҳеч қандай олдинги шартларсиз тайёрлигини кўрсатди — «эндиликда тўп Россия томонида. Биз ҳар икки томон қабул қилдиган ечим сари илгарилашимиз керак», — дея таъкидлади Рубио.

Шунингдек, у АҚШда Россияга нисбатан янги санкцион босимлар талаби кучайиб бораётганини маълум қилди.

Reuters манбаларига кўра, музокараларда аниқ илгарилаш кузатилмаётгани ва ноаниқлик фонида АҚШ президенти Доналд Трамп маъмурияти яқин ойларда Россия билан тинчлик келишувига эришиш имкони жуда паст экани хулосасига келган. Агентликнинг икки юқори лавозимдаги манбалари маълум қилишича, Оқ уй Москва ҳамда Киевга нисбатан босимни кучайтириш бўйича алтернатив механизмлар устида иш бошлаган.

Fox News журналисти Жеки Ҳайнрихнинг АҚШ президенти атрофидаги манбаларга таяниб хабар беришича, Россиянинг нефть экспортига нисбатан жорий этилган чекловларни четлаб ўтиш учун қўлланилаётган «хуфёна флоти»га қарши қатъий чоралар кўриш ҳам кўриб чиқилмоқда. Унинг маълум қилишича, Доналд Трамп Владимир Путинни музокара жараёнини атайлаб чўзмоқда, деб ҳисоблайди.

Reuters нашрига кўра, АҚШ ҳукумати Россияни Украинадаги урушни тўхтатиш борасидаги ёндашувини ўзгартиришга мажбурлаш учун қўшимча иқтисодий ва дипломатик чораларни ишлаб чиқмоқда.

#Россия #Европа