Кипр парламентида Роман Абрамовичнинг фирмасини текшириш талаб қилинди

Кипр парламент қўмитаси россиялик миллиардер Роман Абрамовичнинг бизнесини текширишга тайёргарлик кўрмоқда. Коррупция ва уюшган жиноятчиликни тадқиқ этиш марказининг (OCCRP) маълум қилишича, унинг 18,5 миллион доллар солиқ ҳисобланганидан кейин тугатилган компанияларидан бири фирибгарлик схемасига алоқадор бўлиши мумкин.

OCCRP ҳамда унинг Кирпдаги CIReN шериклик маркази томонидан ўтказилган тергов Абрамовичнинг Blue Ocean компанияси миллиолаб евролик солиқлардан қочишга оид кўп йиллик схемаларда иштирок этганини аниқлаган. Бунинг учун Кипрда суперяхталарни ижарага бериш билан шуғулланувчи сохта тузилма яратилган.

Абрамовичнинг схемаси 2005 йилдан 2012 йилга қадар ишлаган. OCCRP терговига кўра, яхталардан тижорий мақсадларда фойдаланилмаган, ижара шартномалари эса эски сана билан расмийлаштирилган. Виргин оролларида рўйхатдан ўтказилган компаниялар Абрамовичнинг 1,2 миллиард долларлик яхталари — Ecstasea, Le Grand Bleu, Pelorus, Eclipse ва Luna’га эгалик қилган. Улар худдики Кипрдаги Blue Ocean Yacht Management’га, ўз навбатида, яхталар учинчи томонга ижарага берилиши керак бўлган. Аммо Абрамович ходимларининг ички ёзишмаларидан аксарият «круизлар» амалга оширилмагани ва шартномалар фақат ҳолдинг ичидаги молиявий операциялар учун тузилгани маълум бўлган.

Blue Ocean солиқ имтиёзларини, жумладан, ҚҚС ва ёнилғи учун бож тўлашдан озод бўлиш учун сохта шартномалардан фойдаланган. Натижада, яхшигина фойда кўрилган: Ecstasea яхтаси битта рейснинг ўзида ёнилғидан 44 минг доллар тежаган. Кипр қонунчилигига мувофиқ, солиқ тўловчилар огоҳлантириш олганидан кейин 30 кун ичида ҚҚС тўлаши керак — акс ҳолда улар жиноий жавобгарликка тортилиши мумкин.

Парламентдаги мухолиф Volt партияси депутати Александра Атталидес OCCRP терговига асосланган ҳолда Этика масалалари бўйича қўмитага мактуб йўллаган. Унда депутат солиқларнинг тўланиши бўйича маълумотларни текширишни талаб қилган.