Трамп фирибгарлик учун қамалган Nikola Motor асосчисини афв қилди

Тревор Милтон 2023 йил декабрь ойида электр юк машиналари ишлаб чиқарадиган компанияси ҳақида инвесторларни алдаганликда айбдор деб топилган эди.

Фото: Teslarati

Nikola Motor компанияси асосчиси, аввалроқ инвесторларни алдагани учун қамалган Тревор Милтон АҚШ президенти Доналд Трамп томонидан афв этилди. Милтон фирибгарлик учун тўрт йиллик қамоқ жазосини ўтаётганди, аммо ҳозир озодликка чиқди.

Милтон 2023 йил декабрь ойида электр юк машиналари ишлаб чиқарадиган компанияси ҳақида инвесторларни алдаганликда айбдор деб топилди. Масалан, у Nikola компанияси юк машинасини «нолдан» яратганини айтди, гарчи аслида бундай бўлмаса-да. Шу сабабли компания акциялари қулади ва одамлар катта пул йўқотди. Аммо Трамп уни кечиришга қарор қилди.

Милтоннинг ўзи шундай деди: «Менга эркинлик бергани учун Трампдан миннатдорман. Бу нафақат менга, балки адолатсиз ҳукм қилинган барчага тегишли».

Энди у ўз ҳаёти ҳақида ҳужжатли фильм чиқаришни режалаштирмоқда. Афвдан кейин Милтон акциядорларга пулларни қайтариши шарт эмас, бу ҳам баҳс-мунозараларга сабаб бўлмоқда.

#АҚШ #Доналд Трамп #Тревор Милтон