Тошкент метросининг Юнусобод йўналишида FacePay орқали тўлов тизими ишга туширилди

Транспорт вазилриги яқин орада ушбу тизим барча метро бекатларида жорий этилишини маълум қилди.

Фото: Транспорт вазирлиги

FacePay тўлов тизими энди Тошкент метрополитенининг Юнусобод линиясида ҳам ишга туширилди, деб хабар беради Транспорт вазирлиги.

Янги хизмат йўловчиларга турникет камерасига қараб нақд пул, карта ва ҳатто смартфонсиз йўл ҳақини тўлаш имконини беради.

Қайд этилишича, ушбу тизим Cлиcк ва АТТО билан ҳамкорликда ишлаб чиқилган.

«FacePay метрода саёҳат қилишни янада қулайлаштиради, тўлов вақтини қисқартиради ва қоғоз чипталарга бўлган эҳтиёжни бартараф этади. Яқин орада ушбу тизим барча метро бекатларида жорий этилади», — дейилади хабарда.

FacePay ишлаши учун аввало йўловчиларнинг юзи ҳақидаги маълумотлар қурилманинг базасига киритилиши лозим. Бунинг учун йўловчи АТТО ёки Click иловасига кириб, тегишли функцияни фаоллаштириш орқали юзни сканерлаши керак бўлади.

Эслатиб ўтамиз, 2021 йилда Тошкент метросининг «Буюк ипак йўли» бекатида FacePay тизими жорий этилганди. Аммо кейинроқ қурилмалар олиб ташланган. 2023 йилда эса айнан шу бекатда FacePay тизимини яна синовдан ўтказиш бошланган эди.

#FacePay #Тошкент метроси