Нетаняҳу Ғазони босиб олиш билан таҳдид қилмоқда

Исроил агар фаластинликлар Тел Авив шартлари бажармаса, бутун Ғазо ҳудудини аннексия қилишни ваъда берди

Фото: Los Angeles Times

Бинямин Нетаняҳу ҲАМАС томонидан гаровда сақланаётган исроилликлар озод этилмаса, Исроил бутун Ғазо ҳудудини босиб олади, деган таҳдидини яна бир бор такрорлади. Бу огоҳлантириш Исроилнинг иккинчи ҳафта давом этаётган ҳаво ҳужумлари ортидан янгради. Биргина оташкесим бекор бўлган сўнгги кунларда зарбалар оқибатида800 дан ортиқ фаластинлик ҳалок бўлди.

Нетаняҳунинг таъкидлашича, ҲАМАС гаровдагиларни озод қилишдан қанчалик бош тортса, Исроил шунчалик қаттиқроқ жазо чораларини қўллайди. У жумладан ҳудудларни эгаллаш ва яна ҳозирча аниқлик киритилмаган бошқа чоралар ҳақида гапирди.

Бироқ амалий жиҳатдан айнан Исроил тинчлик музокараларидан воз кечди ҳамда урушни тўхтатиш бўйича иккинчи босқичга ўтишдан бош тортди. Тел Авив олиб борилаётган тажовуз ва фаластинликларга нисбатан зулмни давом эттириш орқали Нетаняҳуга шерик бўлган ултраўнгчи сиёсий гуруҳларнинг кутилмаларини қондирмоқда.

Бундан олдин Исроил мудофаа вазири Исраэл Кац ҳам Тел Авив Ғазони тўлиқ оккупация қилиш ниятида эканини айтган эди.

Айни пайтда Исроил ўз ҳужумларини юмшатиш ёки Ғазога ёрдам етказиш учун ўтиш пунктларини очиш ниятида эканини кўрсатмаяпти.

Ғазо Соғлиқни сақлаш вазирлиги маълумотига кўра, 18 мартдан бошлаб Исроилнинг янги ҳужумлари натижасида 830 фаластинлик ҳалок бўлган, яна 1787 киши яраланган. Кўпчилик жабрланувчилар аёллар ва болалардир.

БМТ маълумотига кўра, Исроил ҳужумлари ва эвакуация бўйича чиқарилган буйруқлар туфайли 124 минг фаластинлик яна ўз уйларини тарк этишга мажбур бўлган.

2023 йил октябридан бери Ғазода давом этаётган қаттиқ ҳарбий амалиётларда 50 мингдан ортиқ фаластинлик ҳалок бўлди, уларнинг аксарияти аёл ва болалар. Яраланганлар сони эса 113 мингдан ошиб кетган.

Ғазодаги қурбонлар сони кўпайиб бораётган бир пайтда Исроил ва ҲАМАС ўртасидаги оташкесим музокаралари тўхтаб қолган. АҚШ, Қатар ва Миср воситачи сифатида иштирок этган ушбу жараёнда келишувнинг 1 мартда тугаган биринчи босқичи янгиланмади.

ҲАМАС Исроилни тинчлик музокараларини атайин йўққа чиқарганликда айбламоқда. Аслида бу музокаралар фаластин эксклавида урушни тўлиқ тўхтатишга қаратилган эди.

#Исроил #Бинямин Нетаняҳу #Ғазо