АҚШда суд сунъий интеллект томонидан яратилган асар муаллифлик ҳуқуқи билан ҳимояланмаслигини тасдиқлади

Федерал апелляция суди олим Стивен Талернинг DABUS сунъий интеллект тизими яратган тасвирга муаллифлик ҳуқуқини бериш ҳақидаги аризасини рад этди.

Фото: REUTERS

Вашингтондаги Колумбия округи Федерал апелляция суди инсон иштирокисиз сунъий интеллект томонидан яратилган санъат асари АҚШ қонунчилигига мувофиқ муаллифлик ҳуқуқи билан ҳимояланмаслигини тасдиқлади. Бу ҳақда Reuters хабар бермоқда.

Суд АҚШ Муаллифлик ҳуқуқи бошқармаси билан келишган ҳолда олим Стивен Талернинг DABUS сунъий интеллект тизими яратган тасвирга муаллифлик ҳуқуқи берилмаслиги тўғрисидаги қарорни маъқуллади.

2022 йилда Муаллифлик ҳуқуқи бошқармаси Талернинг аризасини рад этиб, муаллифлик ҳуқуқи фақат инсон томонидан яратилган асарларга нисбатан қўлланиши мумкинлигини билдирганди.

2023 йилда Колумбия округи федерал судьяси ушбу қарорни тасдиқлади ва инсон муаллифлиги “асрлар давомида шаклланган тушунча”га асосланиб, “муаллифлик ҳуқуқининг асосий талаби” эканини таъкидлади.

Талер Колумбия округи Апелляция судига йўллаган мурожаатида бундай қарор “ривожланаётган соҳага сармоя киритиш ҳамда у билан ишлаш истагини сўндириши” мумкинлигини айтган.

Судья Патрисия Миллеттнинг айтишича, АҚШнинг муаллифлик ҳуқуқи тўғрисидаги қонуни “барча асар дастлаб инсон томонидан яратилишини талаб қилади”.

Аввалроқ, Буюк Британия Олий суди сунъий интеллектни ихтирочи сифатида тан олиш ва унга патент ҳуқуқи берилиши мумкин эмас, деган хулосага келганди.

#АҚШ #суд #сунъий интеллект #муаллифлик ҳуқуқи