АҚШда аэропортда ўз итини ўлдирган аёл қўлга олинди

Полиция маълумотига кўра, у 9 ёшли цвергшнауцер зотига мансуб Тайвинн лақабли итни рейсга олишга рухсат берилмаганидан сўнг ўлдирган, деб ёзмоқда Orlando Sentinel.

Кузатув камералари ёзувларида Лоуренс Колумбия пойтахти Богота шаҳрига парвоз олдидан авиакомпания агентлари билан тахминан 15 дақиқа давомида тортишгани қайд этилган. Кейин у ит билан яқин атрофдаги ҳожатхонага йўл олган, аммо у ердан фақат якка ўзи чиқиб келган. Бундан сўнг терминални тарк этган, кейин эса қайтиб келиб, учоққа чиқиб кетган.

Меҳмонхоналардан бири ходимасининг айтишича, у ҳожатхонада бир аёл (кейинчалик у Лоуренс деб аниқланган) полдаги сув ва ит емини тозалаётганини кўрган. 20 дақиқа ўтиб, у яна ҳожатхонага кирган ва ўша аёл ҳожатхона кабинкасидан чиқиб келганини кўрган. Ходима чиқинди қутисини олиб чиқмоқчи бўлганида, унинг оғир эканини сезган ва қутини очиб қараганда, ичида итнинг жасадини топган.

Полиция воқеа жойига етиб келганида, пакет ичида Элисон Лоуренс исми ва телефон рақами ёзилган жетон, итнинг бўйинбоғи, саёҳат сумкаси ва «хизмат ити» деган ёзувли камарча борлиги аниқланган.

Ветеринария мутахассислари ит танасини текширганда, чап оёғида қон излари бўлган. Суд-тиббиёт экспертизасига кўра, итнинг ўлимига сувда чўктирилиш сабаб бўлган.

Ит танасидан микрочип ҳам топилган, ундаги рақам Лоуренсга тегишли экани тасдиқланган.

Полиция аёлнинг АҚШга қачон қайтгани ҳақида маълумот бермаган. У шу ҳафта ичида шериф офиси томонидан ҳибсга олинган, аммо 5 минг доллар гаров эвазига озод этилган.

Энди Элисон Лоуренсга ҳайвонга нисбатан шафқатсиз муомала қилиш моддаси бўйича оғирлаштирувчи ҳолатлар билан айблов қўйилган. Агар у айбини тан олса 5 йилгача озодликдан маҳрум этилиши мумкин.