AP: Исроил ва АҚШ Судан ва Сомалига Ғазо секторидан фаластинликларни қабул қилиш таклифи билан мурожаат қилди

АҚШ ва Исроил Ғазо секторидан фаластинликларни кўчириш масаласида Судан ва Сомали, шунингдек, тан олинмаган Сомалиленд ҳукуматлари билан боғланди, деб ёзади Associated Press АҚШ ва Исроил расмийларига таяниб.

Нашр манбаларига кўра, АҚШ ва Исроилнинг бу борадаги алоҳида алоқалари феврал ойида – АҚШ президенти Доналд Трамп Исроил бош вазири Бинямин Нетаняҳу билан биргаликда Ғазодан фаластинликларни кўчириш режасини тақдим этганидан кейин бошланган. Африка давлатлари билан музокараларда етакчи рол Исроилга берилган, бироқ музокаралар қайси босқичда экани ва ким билан олиб борилаётганига аниқлик киритилмаган.

Фаластинликларни қабул қилиш эвазига Исроил ва АҚШ Африка мамлакатларига кўплаб молиявий, дипломатик ва хавфсизлик билан боғлиқ имтиёзлар – қарзлардан кечиш, қурол-яроғ, технология ва дипломатик ёрдам таклиф қилиши мумкин.

Судандаги икки мулозим Трамп маъмурияти ҳарбийлар бошчилигидаги ҳукуматга фаластинликларни қабул қилиш таклифи билан мурожаат қилганини тасдиқлади, бироқ у «дарҳол рад этилгани»ни айтди. Сомали ва Сомалиленд вакиллари ҳеч қандай алоқа ҳақида маълумотга эга эмасликларини билдиришган.

AP учала ҳудуд ҳам қашшоқлиги ва баъзи ҳолларда зўравонлик билан қамраб олингани сабабли, фаластинликларни у ерга кўчириш таклифи Трамп томонидан эълон қилинган мақсадни шубҳа остига қўйишини қайд этган – у режани амалга ошириш натижасида қочқинлар «жуда бахтли ва жуда хавфсиз» яшашини айтганди.

Феврал ойи бошида Доналд Трамп Исроил бош вазири Бинямин Нетаняҳу билан қўшма матбуот анжуманида фаластинликларни Ғазо секторидан бошқа мамлакатларга кўчириш, Ғазода эса «Яқин Шарқ ривераси» қуриш режаси ҳақида гапирганди. Шу билан бирга, у режани амалга оширишда АҚШ ҳарбийлари иштирок этишини истисно қилмаган.

Феврал ойи охирида Трамп сунъий интеллект ёрдамида яратилган роликни эълон қилди, унда Ғазо секторининг пляжлари ва осмонўпар бинолари, жумладан, «Трамп Ғазоси» минораси бўлган замонавий шаҳар сифатидаги қандайдир келажаги кўрсатилган. Видеода Трампнинг ўзи ярим яланғоч аёл билан барда рақсга тушаётгани ва Исроил бош вазири Бинямин Нетаняҳу билан пляжда дам олаётгани тасвирланган. Лавҳада, шуниндек, Трампнинг шу кунлардаги ҳамфикри, миллиардер, АҚШ Ҳукумат самарадорлиги департаменти (DOGE) раҳбари Илон Маскни бир неча марта кўриш мумкин. У баъзи саҳналарда овқатланаётгани, яна баъзиларида пул сочиб, кўнгилхушлик қилаётгани акс этади.