Ойга яна бир хусусий компания космик аппарати қўнди. Аммо миссия 24 соатга бормай якунланди

Техасда жойлашган Intuitive Machines компаниясининг Ойга қўнган модули ишламай қолди, деб хабар бермоқда ABC News.

Миссия космик объектга омадсиз қўнишни амалга оширганидан салкам 24 соат ўтиб якунланди. Ўтган ҳафта учирилган «Афина» номли модул белгиланган жойдан 800 фут (250 метр) узоққа бориб қолган ва музли кратерга қўнишга мажбур бўлган.

Модул ўзининг қаерга қўнганини тасдиқловчи суратни жўнатишга ва ўчиб қолишдан олдин бир нечта тажрибани фаоллаштиришга муваффақ бўлган.

«Афина»нинг қуёш панеллари йўналиши ва кратердаги экстремал совуқ инобатга олинган ҳолда унинг батареяларининг қайта қувватланиш эҳтимоли жуда паст баҳоланмоқда.

Бу Intuitive Machines учун Ойга қўнишнинг иккинчи уриниши эди. Бир йил олдин амалга оширилган биринчи уриниш ҳам у ёнлама қўнган, бироқ модул кўпроқ муддат фаолият кўрсатган эди.

Аввалроқ Firefly Aerospace компаниясининг Blue Ghost космик аппарати Ой юзасига муваффақиятли қўнишни амалга оширганди. Бу хусусий компанияга тегишли аппаратнинг Ер табиий йўлдошига биринчи марта қўниши ҳисобланади ва унинг миссияси 14 кун давом этади.

Япониянинг ispace компанияси ҳам Ойга ўз аппаратини учирган, аммо унинг қўнишига ҳали уч ой бор. У ҳам Blue Ghost билан бирга 15 январ куни Канаверал бурнидан учирилган эди, бироқ унинг парвози учун узоқ маршрут танланган.