Учта вилоятда “валютчиклар” ушланди

Жиззах, Андижон ва Навоий вилоятларида валюта айирбошлаш билан шуғулланиб келган шахслар ушланган. Бу ҳақда Бош прокуратура ҳузуридаги департамент хабар бермоқда.

Маълум қилинишича, департаментнинг Жиззах шаҳри бўлими ва Миллий гвардия вилоят бошқармаси ходимлари билан ҳамкорликда ўтказилган тезкор тадбирда валюта айирбошлаш билан шуғулланиб келган И.С. 10 000 долларни 129,2 млн сўмга сотган вақтида ушланиб, унинг ёнидан сотишга мўлжаллаган 5 563 доллар ва 7,8 млн сўм борлиги аниқланган барча пуллар ашёвий далил сифатида олинган.

Департаментнинг Андижон шаҳри бўлими ва ИИБ ходимлари ҳамкорлигида ўтказилган тезкор тадбирда валюта айирбошлаш билан шуғулланиб келган Қ.А. ва А.Э. фуқаро Я.Ю.га 4 000 долларни 51,5 млн сўмга сотган вақтида ашёвий далиллар билан ушланган.

Департаментнинг Навоий вилояти бошқармаси томонидан “Маликработ” МФЙ ҳудудида ўтказилган тезкор тадбирда валюта айирбошлаш билан шуғулланиб келган фуқаро Ж.И. фуқаро Ш.С.га 3 400 долларини 44,2 млн сўмга сотган вақтида ашёвий далиллар билан ушланган.

Қайд этилишича, мазкур ҳолатлар юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят ишлари қўзғатилиб, тергов ҳаракатлари ўтказилмоқда.