Навоийда 8-синф ўқувчиси фарзандли бўлди

Кармана туманидаги 15-мактаб ўқувчиси фарзанд кўрди. Ушбу мактабда ўтган йили ҳам эрта туғуруқ ҳолати кузатилган. Ҳолатни прокуратура ўрганмоқда.

Кармана туманида мактаб ўқувчиси она бўлди. Бу ҳақда Kun.uz манбаси хабар берди.

Унга кўра, тумандаги 15-умумтаълим мактабининг 8-синфида ўқийдиган ўқувчи фарзандли бўлган. Буни Kun.uz’га Кармана тумани мактабгача ва мактаб таълими бўлими мудири Сарвар Очилов ҳам тасдиқлади.

Сарвар Очиловга кўра, ҳозирда ҳолат прокуратура томонидан ўрганилмоқда. Мактаб директори Юлдуз Ўроқованинг ишда қолиш-қолмаслик масаласи кўриб чиқилади.

Kun.uz манбасининг қўшимча қилишича, мактаб директори топшириғига асосан она бўлган ўқувчи гарчи мактабга келмаса-да, унга айрим фанлардан баҳо қўйиб борилган.

Ушбу мактабда ўтган йили ҳам эрта туғуруқ ҳолати кузатилган. Ўшанда мактабнинг 10-синф ўқувчиси она бўлган. Ҳозирда бу ўқувчи 11-синфда таҳсил олмоқда.

Олдинроқ Хоразмда 7-синф қизи фарзанд кўргани хабар қилинганди.

#Навоий #ўқувчи #Кармана тумани