ЕИ давлатлари Россияга қарши санкцияларини узайтиришга келишиб олди

Венгрия Украина ўз ҳудуди орқали Россия гази транзитини тўхтатганидан норози бўлиб, санкцияларни узайтиришга қарши чиқаётган эди. Еврокомиссия кафолатларидан сўнг мамлакат ўз позициясини ўзгартирди.

Фото: AFP

Овоз бериш жараёнлари Украина ҳудуди орқали газ транзити тўхтатилганига қаршилик билдирган Венгрия позицияси сабаб барбод бўлиши мумкин эди, деб ёзади Reuters. Аммо ЕИ элчиларининг учрашувида Еврокомиссия баёнот билан чиқиб, Киев билан Украина газ қувурлари тизими орқали Европага газ етказиб бериш бўйича музокараларни давом эттиришга ваъда берди. Баёнотда, шунингдек, Еврокомиссия жараёнга Венгрия ва Словакияни ҳам жалб этишга тайёрлиги айтилди.

Венгрия ТИВ раҳбари Петер Сийярто ўз мамлакати энергетика хавфсизлиги бўйича сўралган кафолатларни олганини маълум қилиб, Еврокомоссия ЕИга келадиган газ қувурлари ҳимоясини, шунингдек, Украинадан таъминотни сақлаб қолиш учун кафолат сўраш бўйича масъулиятни зиммасига олганини таъкидлади.

Европалик амалдорларнинг сўзларига кўра, санкцияларни узайтира олмаслик «жиддий оқибатларга» олиб келиши мумкин эди — масалан, Киевга ёрдам кўрсатишда фойдаланилаётган Россиянинг Европадаги активларини музлатишдан чиқаришга тўғри келарди.

Россия билан савдони чеклаш ва мамлакат Марказий банки активларини музлатишни назарда тутувчи санкциялар ҳар ярим йилда узайтирилади. Бунинг учун ЕИга аъзо давлатларнинг барчаси овоз бериши керак. Аммо бу сафар ЕИ давлатлари Венгрия қаршилигига дуч келди — ушбу мамлакат Киев Россия газини Украина ҳудуди орқали транзитини тўхтатиб қўйганидан норози. Венгрия бош вазири Виктор Орбан чекловларни узайтиришдан олдин АҚШ президенти Доналд Трампнинг инаугурациясини кутмоқчи эканини айтган эди.

#Венгрия #ЕИ #санкциялар