Трамп Россияга музокаралардан бош тортса «жиддий санкциялар» билан таҳдид қилди

АҚШ президенти Доналд Трамп ўзининг Truth Social ижтимоий тармоғида Россияга қарши «жиддий санкциялар» жорий этишга ваъда берди. Ушбу чекловлар Украинада ўт очишни бутунлай тўхтатилишига қадар амалда бўлади.

«Россия Украинани жанг майдонида мутлақо „парчалаяпти“ деган ҳақиқатдан келиб чиқиб, мен Россияга қарши йирик банк санкциялари, чекловлар ва тарифларни қўллашни қатъий кўриб чиқяпман, токи ўт очишни тўхтатиш ва якуний тинчлик келишувига эришилгунга қадар. Россия ва Украина, жуда кеч бўлмасдан, ҳозир музокара столига ўтиринг. Раҳмат!!!», деб ёзди Трамп.

Трамп сайловолди ташвиқоти давомида «24 соат ичида тинчликка эришиш» режаларини кўп марта эълон қилган, бироқ лавозимга киришганидан сўнг, муҳим натижаларга эриша олмади. Бундан ташқари, унинг маъмурияти томонидан кўрилган чоралар асосан Украинага босим ўтказиш, жумладан, у билан разведка маълумотларини алмашишдан бош тортиш ва ҳарбий ёрдамни музлатиш билан чекланди. Трампнинг махсус вакили Кит Келлогг бу Украинани Россия билан музокара олиб боришга мажбур қилиши кераклигини тўғридан тўғри таъкидлади.

АҚШ Украинага қилган тажовузи учун Россияга қарши санкцияларни 2014 йилда жорий этган. Ҳозир чекловлар рўйхатида Россиянинг юзлаб фуқаролари ва компаниялари бор. Шунингдек, Байден маъмурияти томонидан киритилган санкциялар рўйхатига Россия нефтини ташувчи 161 танкер киритилган.

Аввалроқ, Трампнинг Украина ва Россия бўйича махсус вакили Кит Келлогг Россияга қарши жорий этилган санкциялар самарали эмаслигини айтган эди.

«Улар 10 баллик тизим бўйича 6 балл даражасида. Лекин уларнинг амалга оширилиши 3 балл даражасида. Иқтисодиётга зарба берадиган санкциялар керак. Биз буни Эрон билан ўтмишда қилганмиз, биз бу мамлакатни чиндан ҳам синдирган санкцияларни қўйганмиз», деб таъкидлади у.