Эрон президенти Кремлда музокараларга кеч қолган Путинни кутишдан бош тортган

Эрон президенти Масъуд Пизишкиён 17 январ куни Москвага ташрифи чоғида Россия президенти Владимир Путинни кутишдан бош тортди. Бу ҳақда Iran International хабар берди.

Пизишкиён ўзи бошчилигидаги делегация билан Кремлга вақтида етиб келган, аммо унга Путин учрашувга ҳали тайёр эмаслиги айтилган. Эрон етакчиси залда кутиб ўтириш ўрнига меҳмонхонага кетишга қарор қилган. Кейинроқ у қарийб 1 соатга кечиккан музокаралар учун Кремлга қайтган.

Ташриф доирасида Эрон ва Россия стратегик шериклик тўғрисидаги шартномани имзолади. Ҳужжат доирасида мудофаа ва хавфсизлик соҳасидаги ҳамкорлик мустаҳкамланади, аммо унда ҳарбий мажбуриятлар белгиланмаган. Путиннинг таъкидлашича, мазкур шартнома шу жиҳатдан Россия ва Шимолий Корея ўртасидаги келишувдан фарқ қилади.

Путиннинг муҳим учрашувларга кеч қолиши одатга айланган. Масалан, Германиянинг собиқ канцлери Ангела Меркел шу каби ҳолатга икки марта дуч келган — 2014 йил октябрдаги учрашувга РФ етакчиси олти соат кечиккан. Путин 2012 йили Ялтада Украина президенти Виктор Януковични уч соат куттирган. Япония, Мўғулистон ва Исроил етакчилари ҳам уни бир неча соат кутишга мажбур бўлган. 2012 йилда АҚШ президенти Барак Обама Путин 40 дақиқага ушланиб қолгани учун ўз режаларини ўзгартиришига тўғри келган. Путин ҳатто Буюк Британия қироличаси Елизавета II ҳамда Рим папаси билан учрашувларга ҳам кеч қолган. У 2018 йилда Доналд Трамп билан учрашувга ҳам вақтида келмаган. Аммо Трамп буни олдиндан билгандек янада кечроқ келган ва Путиннинг ўзини 20 дақиқа кутишга мажбур қилган.

Россия президентининг кеч қолишининг бир нечта версиялари бор. Таъкидланишича, шу орқали Путин муҳим аҳамиятга эга эканини кўрсатиб қўймоқчи бўлади, шунингдек, у суҳбатдошини чалғитишга ва музокараларда устуворликка эришишга уринади. Яна бир версияга кўра, Путиннинг кеч қолишида ҳеч қандай яширин маъно йўқ — у шунчаки кечикади.