Россияда америкалик аскар беш йилгача қамоқ жазосига ҳукм қилиниши мумкин

Севган қизини кўриш учун Владивостокка учиб келган АҚШ армияси катта сержанти Гордон Блэк ундан 200 минг рубл ўғирлаганликда гумон қилинмоқда. Бу ҳақда 7 май, сешанба куни «Известия» газетаси ҳуқуқ-тартибот идораларидаги манбаларига таяниб хабар берди. Нашрнинг ёзишича, Блэк катта миқдорда зарар етказган ўғирликда айбланмоқда (Россия Федерацияси Жиноят кодекси 158-моддаси 2-қисми «в» банди), бу моддада беш йилгача озодликдан маҳрум қилиш жазоси назарда тутилган.

The New York Post нашрининг ёзишича, ҳарбий хизматчи Владивостокка Валентина Вашчук исмли қизнинг олдига келган, у 31 ёшда. Журналистлар Вашчук ва Блэкнинг TikTok'да жойлаштирган видеоларига эътибор қаратди. Улардан бирида америкалик аскар НАТО блокини «тажовузкор» деб атаган ва «ўзини ҳимоя қилмоқчи бўлган Россияни тушунишини» айтган. Бошқа бир видеода у севгилисининг «(Доналд) Трамп яхшироқ» деган сўзларига қўшилади ва ўз мамлакати ҳамда Россия ўртасидаги муносабатларнинг ёмонлашувида АҚШнинг амалдаги президенти Жо Байденни айблайди. Бир нечта видеоларда қиз Блэкни ҳақоратлаб, уни масхара қилади.

АҚШ аскари қўмондонликни хабардор қилмай Россияга кетган

Жанубий Кореядаги АҚШ ҳарбий базасида хизмат қилган 34 ёшли Блэк Техасдаги Форт-Кавасосга ўтказилган. Бироқ, у ерга учиб кетишнинг ўрнига, катта сержант Хитойга ўтиб, Владивостокдаги қизнинг олдига келган. Қиз ўғирлик ҳақидаги ариза билан полицияга мурожаат қилганидан сўнг, у меҳмонхонада қўлга олинган. Россия Ички ишлар вазирлигининг аниқлик киритишича, Блэк 2 май куни ушланган.

Пентагон воқеа юзасидан ўз текширувини ўтказаётганини маълум қилди. Вашингтоннинг таъкидлашича, Блэк Владивостокка учиш режалари ҳақида қўмондонликни хабардор қилмаган ва бундай саёҳатга рухсат олмаган. Аввалроқ АҚШ Давлат департаменти Украинадаги уруш ва икки давлат ўртасидаги муносабатлардаги умумий кескинлик фонида мамлакат фуқароларини Россияга сафар қилмаслик тўғрисида қатъий огоҳлантирган эди.

Америка расмий манбалари, шунингдек, Блэк уйлангани ва россиялик севгилиси билан Жанубий Кореяда танишгани ҳақида хабар берди. Бироқ ўтган йилнинг кузида улар ўртасида можаро келиб чиққан, шундан сўнг қиз Россия Федерациясига қайтган. Россия ИИВ маълумотларига кўра, шундан сўнг улар интернет орқали мулоқот қилишда давом этган. Сержантнинг рафиқаси журналистларга изоҳ беришдан бош тортди.