Душанбе: Россияда Тожикистон фуқароларининг ҳуқуқ ва эркинликлари кенг миқёсда поймол қилинмоқда

Тожикистон Ташқи ишлар вазирлиги 29 апрел куни Россия элчиси Семён Григорьевга нота топширди.

Вазирлик ахборотига кўра, нотада Россия ҳудудида Тожикистон фуқароларига нисбатан оммавий тарзда кескин салбий муносабатлар кузатилаётгани, шунингдек, уларнинг ҳуқуқ ва эркинликлари кенг миқёсда поймол этилаётганидан жиддий ташвиш билдирилган.

Ҳужжатда, шунингдек, бундай хатти-ҳаракатлар фақатгина Тожикистон фуқароларига нисбатан бўлаётгани, бу эса Тожикистон–Россия муносабатларининг руҳи ва анъаналарига мос эмаслиги таъкидланган.

Аввалроқ Тожикистон ўз фуқароларини “ўта зарурат бўлмаса” Россияга бормасликка чақирган эди.

Бундан олдин расмий Душанбе тожикистонликларни Россия ҳудудига киритмаслик билан боғлиқ ҳолатлар бир неча ҳафтадан буён оммавий равишда давом этаётганини билдирган.

Тожикистон ТИВнинг 28 апрелдаги хабарига кўра, Москвадаги аэропортларда мингга яқин Тожикистон фуқаролари ушланиб қолган, улар орасида Россия ҳукуматининг грантлари асосида ўқишга келган талабалар ҳам бор. Баёнотда айтилишича, “бундай чеклов чоралари фақатгина Тожикистон фуқароларига нисбатан” қўлланилмоқда.

Россияда Тожикистон фуқароларига нисбатан чекловлар Москва вилоятидаги “Крокус Сити Ҳолл” концерт залида рўй берган терактдан кейин кузатила бошланган эди. 140 дан ортиқ инсон ҳалок бўлган ҳодисадан кейин Россияда мигрантларга қарши чекловлар киритиш масаласи фаол муҳокама қилина бошланди.