Андижонда 42 млрд сўмлик йўл лойиҳасини олиб беришни ваъда қилган шахслар қўлга олинди

Улар тадбиркорга 10 фоизлик улуш эвазига Асака туманидаги 42 млрд сўмлик йўл қурилиши лойиҳасини олиб беришни ваъда қилган.

Андижонда қиймати 42 млрд сўмлик асфалтли бетон (боғловчи материал сифатида битум ишлатилган бетон) қилинадиган йўл қурилиши лойиҳасини тадбиркорга олиб бермоқчи бўлган шахслар ушланди. Бу Андижон шаҳрида ўтказилган тезкор тадбирда маълум бўлди.

Давлат хавфсизлик хизмати хабар беришича, Андижон туманида яшовчи фуқаро Андижон шаҳрида истиқомат қилувчи шахс билан келишиб, йўл қурилиши соҳасида фаолият юритувчи тадбиркор ишончига кирган.

Улар юқори лавозимда ишловчи танишлари орқали, тадбиркорга Асака туманидаги «4Р-112» автомобил йўлининг 4 км қисмига асфалтли бетон қопламасини ётқизиш бўйича лойиҳани олиб беришни ваъда қилган.

Бунинг эвазига лойиҳа учун ажратиладиган 42 млрд сўмнинг 10 фоизини (4,2 млрд сўм) беришни сўраган.

ДХХ ва Бош прокуратура ҳузуридаги Департамент ходимлари шахслардан бирини сўралган пулдан 20 минг АҚШ долларини олган вақтида ашёвий далиллар билан қўлга олди.

Ҳозирда мазкур шахсларга нисбатан Жиноят кодексининг 168 (фирибгарлик) ва 28,211-моддалари (пора бериш) билан жиноят иши қўзғатилиб, қамоқ эҳтиёт чораси қўлланди.

#фирибгарлик #Асака тумани #пора бериш