БМТ Хавфсизлик кенгаши ҲАМАСнинг ҳаракатлари бўйича бир қарорга кела олмади

Бирлашган Миллатлар Ташкилоти Хавфсизлик кенгаши навбатдан ташқари йиғилишда ҲАМАС ҳаракатини бир овоздан қоралаб чиқмади. 8 октябр, якшанба куни ёпиқ эшиклар ортида бўлиб ўтган йиғилишда Хавфсизлик кенгаши аъзолари ягона қарор бўйича келиша олмади, деб хабар берди Американинг CNN телекомпанияси 9 октябр куни дипломатларга таяниб.

«Брифингда аслида нималар муҳокама қилингани ҳақида батафсил маълумот бермоқчи эмасман, бироқ ҲАМАС ҳужумларини қоралаган бир қатор давлатлар бор», — дея CNN АҚШнинг БМТдаги доимий вакили ўринбосари Роберт Вуддан иқтибос келтирган. Шу билан бирга, Вуднинг қўшимча қилишича, айрим давлатлар ҲАМАСни қоралашга тайёр эмас.

Америкалик дипломатга кўра, Қўшма Штатлар БМТ олий органи йиғилишидан олдин ҳам ҲАМАС бир овоздан қораланишини кутаётганини очиқ айтган. «Жаҳон ҳамжамиятининг содир бўлган ва содир бўлаётган ҳужумлар ва ҳаракатларни кескин қоралаши муҳим», деди Роберт Вуд.

ҲАМАСнинг Исроилга ҳужуми

ҲАМАС жангчилари 7 октябр куни эрталаб Ғазо секторидан Исроилга ракета зарбалари бера бошлади. Айни пайтда, фаластинликларнинг қуролли отрядлари қуруқлик, ҳаво ва денгиз орқали Исроилга кириб, бир қатор чегарадош маҳаллаларда ҳужумни амалга оширди.

Улар, Исроил томонига кўра, юздан ортиқ одамни, жумладан, аёллар, болалар ва қарияларни ўғирлаб, Ғазо секторига олиб кетган. Бунга жавобан Исроил авиацияси Ғазодаги ҲАМАС объектларига зарбалар берди.