BMT Xavfsizlik kengashi HAMASning harakatlari bo‘yicha bir qarorga kela olmadi

Birlashgan Millatlar Tashkiloti Xavfsizlik kengashi navbatdan tashqari yig‘ilishda HAMAS harakatini bir ovozdan qoralab chiqmadi. 8 oktyabr, yakshanba kuni yopiq eshiklar ortida bo‘lib o‘tgan yig‘ilishda Xavfsizlik kengashi a’zolari yagona qaror bo‘yicha kelisha olmadi, deb xabar berdi Amerikaning CNN telekompaniyasi 9 oktyabr kuni diplomatlarga tayanib.

«Brifingda aslida nimalar muhokama qilingani haqida batafsil ma’lumot bermoqchi emasman, biroq HAMAS hujumlarini qoralagan bir qator davlatlar bor», — deya CNN AQShning BMTdagi doimiy vakili o‘rinbosari Robert Vuddan iqtibos keltirgan. Shu bilan birga, Vudning qo‘shimcha qilishicha, ayrim davlatlar HAMASni qoralashga tayyor emas.

Amerikalik diplomatga ko‘ra, Qo‘shma Shtatlar BMT oliy organi yig‘ilishidan oldin ham HAMAS bir ovozdan qoralanishini kutayotganini ochiq aytgan. «Jahon hamjamiyatining sodir bo‘lgan va sodir bo‘layotgan hujumlar va harakatlarni keskin qoralashi muhim», dedi Robert Vud.

HAMASning Isroilga hujumi

HAMAS jangchilari 7 oktyabr kuni ertalab G‘azo sektoridan Isroilga raketa zarbalari bera boshladi. Ayni paytda, falastinliklarning qurolli otryadlari quruqlik, havo va dengiz orqali Isroilga kirib, bir qator chegaradosh mahallalarda hujumni amalga oshirdi.

Ular, Isroil tomoniga ko‘ra, yuzdan ortiq odamni, jumladan, ayollar, bolalar va qariyalarni o‘g‘irlab, G‘azo sektoriga olib ketgan. Bunga javoban Isroil aviatsiyasi G‘azodagi HAMAS obektlariga zarbalar berdi.