Спорт | 20:10 / 14.12.2022
29791
13 дақиқада ўқилади

Месси оиласи. Орзуга яна бир қадам қолди

Ҳозирги Аргентинанинг муваффақиятлари сири ҳақида.

Аргентиналиклар хорватларни йирик ҳисобда мағлуб этди ва жаҳон чемпионатининг илк финалчисига айланди.

ЖЧ-2022. Яримфинал, 13 декабр, «Лусайл»
Аргентина — Хорватия 3:0

Голлар: Месси (34, пенальти), Алварес (39, 69).
Аргентина – Эмилиано Мартинес, Молина (Фойт, 86), Отаменди, Ромеро, Таляфико, Де Паул (Паласиос, 74), Мак Аллистер (Корреа, 86), Паредес (Лисандро Мартинес, 62), Фернандес, Месси, Алварес (Дибала, 74).
Хорватия – Ливакович, Юранович, Ловрен, Гвардиол, Соса (Оршич, 46), Модрич (Майер, 81), Ковачич, Брозович (Петкович, 50), Перишич, Пашалич (Влашич, 46), Крамарич (Ливая, 72).
Огоҳлантиришлар: Ливакович (32), Ковачич (32), Ромеро (68), Отаменди (71).

Аргентина ва Нидерландия ўртасидаги чоракфинал ўйини атрофидаги можаро яримфинал арафасида ҳам сўнмаганди. Доимо дипломат бўлган Лионел Скалони ўз футболчилари манзилига билдирилган танқидларни адолатсиз деб атади: «Биз ютқазишни ҳам, ғолиб бўлишни ҳам биламиз. Саудия Арабистонига ютқазганимизда биз бирор сўз айтмагандик. Ўтган йили биз финалда Бразилияни мағлуб этгандик, ўйиндан кейин эса Месси, Неймар ва Паредес иштирокида ажойиб спорт лаҳзаси рўй берганди».

Хорватия билан ўйин арафасида эса томонлар бир-бирига ҳурмат билан муносабатда бўлишди. «Шашкачилар» бош мураббийи Златко Далич Мессини зарарсизлантириш имкониятларини муҳокама қила туриб, кўп вақтни аргентиналиклар сардорига мақтов ёғдиришга сарфлади. Скалони эса футболни ёқтирадиганларнинг барчаси майдонда Модрич каби футболчиларни кўришни исташи ҳақида гапирди. Гарчи кўплаб аргентиналикларда «Реал» яримҳимоячисининг 2018 йилги мундиал гуруҳ босқичида урган голи ёқимсиз хотиралар қолдирган бўлса-да, ўшанда Хорватия 3:0 ҳисобида ғолиб келганди.

Лекин ҳамиша бугунги кун муҳим ҳисобланади, Скалони эса таркиб билан боғлиқ навбатдаги жумбоқни ечиши талаб этиларди, у Де Паул ва Ди Марияга майдонда қанча вақт бериш масаласини ҳал этиши керак эди. Америка Кубоги финалидаги «олтин» гол муаллифи турнир бошидан буён бирор ўйинда тўлиқ иштирок этмаганди, қанотлардаги Монтиэл ва Акуня дисквалификацияга учраганди (сариқ карточкалар) ва тўрт ҳимоячидан иборат схемага қайтилди, буларнинг бари қўшимча ҳавбек — Паредес учун йўл очди.

Аргентина биринчи бўлимдаёқ икки гол фарқи билан олдинга чиқиб олди, танаффусдан кейин эса тўплар нисбати учтага етиб, ўйин масаласи ҳал бўлди. Учала голда ҳам Лионел Месси ҳамда турнир давомида асосий ҳужумчига айланиб борган Хулиан Алварес иштирок этди.

Аввалига хорватиялик ҳимоячилар Мессининг Алваресга узатилган пасини ўтказиб юборди ва Ливакович тўпни эмас, форвардни йиқитишига тўғри келди. Рефери Даниэле Орсато нуқтани кўрсатди, Лео Месси пенальтини аниқ ижро этди ва жаҳон чемпионатларидаги ўйинлари сони бўйича Лотар Маттеус билан тенглашиб олган футболчи (25 тадан), Гариеэл Батистутани ортда қолдирган ҳолда терма жамоанинг мундиалларда энг кўп гол урган футболчисига (11) ва плей-оффнинг уч раундида ҳам гол урган аргентиналикка айланди.

Бу турнир Мессига аталмоқда, у шу вақтга қадар плей-офф ўйинларида гол урмаганди. У катта илҳом билан ўйнамоқда ва ўзини аямаяпти. Иккинчи гол урилган қарши ҳужум вақтида Леони йиқитишга уринишганида ҳам у оддий ва самарали қарорга келиб, тўпни Алваресга етказишга улгурди, ёш форвард эса майдон бўйлаб тўп билан ҳаракатланиб борди, рақиб жарима майдонида қанот ҳимоячилари Юранович ва Соса болаларча хатога йўл қўйишди, натижада Ливаковичда имкон қолмади.

Алварес учун бу турнирдаги учинчи гол бўлди: у аввал Полша (2:0) ва Австралия (2:1) жамоаларига қарши ўйинларда ҳам дарвозани ишғол этганди. 

«Манчестер Сити»нинг 22 ёшли ҳужумчиси мундиал давомида бошланғич таркиб учун рақобатда Лаутаро Мартинесдан устун келди. 170 сантиметрли бу йигитчанинг рақиб зарарсизлантира олмайдиган ўз устун томонлари бор, у «Риверплейт»даги собиқ жамоадоши Энцо Фернандес билан ҳам, терма жамоа етакчиси Месси билан ҳам телепатик даражада бир-бирини тушуниб яхши ўйнайди. Бундай учлик ҳужуми эса ҳар қандай рақиб учун ўта хавфли кўриниш олади. Учинчи голли ҳужумда Лео чемпионатнинг энг яхши ҳимоячиси сифатида эътироф этилган Гвардиол билан нималар қилгани эса — ҳақиқий санъат асари бўлди, бу ҳужум якунида Алварес чемпионатдаги тўртинчи голини нишонлади.

Клубида асосан захирадан ўйнашига қарамай ЖЧ арафасида «Манчестер Сити» бош мураббийи Хосеп Гвардиола Алвареснинг жамоасини турнир фаворити деб атаган.

«Бир куни Хосеп Гвардиола, португаллар ва Родри жамоаларнинг жаҳон чемпионатида ғолиб бўлиш имкониятини муҳокама қилишаётганди. Улар Португалия, Франция ва бошқа жамоаларни тилга олишди. Кейин эса Пеп шундай деди: «Биласизларми, орангизда кимнинг имконияти юқорироқ?» Ва шундан кейин у бармоғини менга қаратди», — деганди Алварес октябр ойи охирида ESPN учун интервюсида.

Алварес ЖЧда терма жамоаси сафида порлади ва Гвардиоланинг сўзларини тасдиқлаш учун жуда яқин келди.

Унинг хорватлар дарвозасига урган иккинчи голидан кейин Скалони ниҳоят Дибалага имкон беришга қарор қилди - анча вақтдан буён Месси таркибда эканида ушбу истеъдодли ҳужумчига жой йўқлиги ҳақида гаплар юради, улар биргаликда ўйнаши эса яна бир бор жамоада ҳеч ким ортиқча эмаслигини кўрсатиб берди, чунки Аргентинада айнан жамоа бор. Орзуга эса яна бир қадам қолди.

Оилага айланган жамоа

«Оила жамоа» атамаси ҳақида кўп эшитамиз. Аммо, қоидага кўра бу йилига 11 ой бирга бўладиган клуб футболчиларига нисбатан қўлланади. Терма жамоада эса бундай жипслашув қийинроқ, аммо Аргентина Америка Кубогида ғалаба қозониш учун шундай жипслаша олганди. 28 йиллик совринсиз даврдан кейин бутун мамлакат кутган муваффақиятга эришилди, Лионел Мессининг финал ўйини арафасидаги нутқи эса — Netflix томонидан ушбу турнирга бағишлаб тайёрланган ва Қатардаги турнир бошланишидан олдин намойиш этилган ҳужжатли филмнинг энг эътиборли қисмидир.

«Биз 45 кун оила аъзоларимизни кўрмадик. Мартинес ва Куарта ота бўлишди ва шу вақтга қадар болалари билан учрашмади. Аммо биз кубокдан бир қадам берида турибмиз ва буни қила олиш ўзимизга боғлиқ. Биз чиқамиз ва уни ютиб оламиз, ғалабани бизни қўллаб-қувватлаб турган оила аъзоларимиз билан бирга баҳам кўриш учун. Бу турнир Аргентинада ўтиши керак эди, аммо худонинг иродаси билан Бразилияга кўчирилди. Бу биз «Маракана»да кубокни бошимиз узра кўтаришимиз учун бўлди. Биз совринни уйга олиб кетишимиз керак», — деганди ўшанда сардор.

Буни кўпчилик муҳокама қилган, аммо навбатдаги муваффақиятсизлик - 2019 йилги Америка кубогида бразиллардан учралган мағлубиятдан кейинги Леонинг сўзларини кўпчилик эсламаслиги мумкин. Ди Мариянинг хотирлашича, ўшанда кийим алмаштириш хонасидаги ҳеч ким кўз ёшларини тия олмаган. Ва афтидан чинакамига кучли бўлишни истаган жамоа айнан ўшанда туғилган. Сардорнинг ўша сўзларидан кейин Аргентина уч йилдан ортиқ вақт мобайнида ютқазмади ва ҳақли равишда ЖЧ-2022 турнирининг асосий фаворитларидан бирига айланди.

Бугунги кунда ўз имкониятларини йўққа чиқаргани учун танқидлар остида қолган Лаутаро Мартинес ҳимоя қилинаётгани ҳам жамоанинг бирдамлигидан дарак беради. «У ўтмишда бизни кўп бор қутқарган. Биргина омадсиз оқшом учун танқид қилиш тўғри эмас. У миллий жамоа учун кўп яхши ишлар қилган ва бизни хурсанд қилишда давом этади. Ҳар бир буюк футболчида шундай ёмон кечалар бўлиб туради», — деганди оқ-ҳаворанглар жамоаси бош мураббийи Лионел Скалони.

Кейин эса Месси сўз олди: «Луатаро — биз учун жуда муҳим футболчи. У ҳужумчи ва голлар билан яшайди. Бундай ҳолат барча билан, жумладан мен билан ҳам бўлиши мумкин. Бу футболнинг бир қисми».

Лео ўз вақтида Гонсало Игуаинни ҳам шундай қўллаб-қувватлаганди, унинг хатолари, мухлисларнинг ҳисоблашича, Аргентинани уч совриндан қуруқ қолдирган. ЖЧ-2014 финалида қулай вазиятларни кўкка совурганидан кейин Пипита фаолиятини якунлашга ҳам тайёр бўлган, аммо онаси уни бу фикрдан қайтарган. Бир йил ўтиб Америка Кубоги финалида пеналтилар сериясида унинг хатоси туфайли жамоа мағлубиятга учрайди, кейинги қитъа битринчилигида ҳам Игуаин чилиликларга қарши финалда юз фоизлик имкониятдан фойдалана олмайди.

«Оилам билан бирга кўпроқ вақт ўтказишни истайман. Бу кўпчиликни қувонтиради, чунки бошқача фикрда бўлганлар камроқлиги аниқ», — деганди форвард 2019 йил баҳорида терма жамоадан кетиши ҳақида эълон қила туриб. Месси — ўшанда унинг ёнида турганлардан бири эди. У барча ютқазилган финаллардан кейин ҳам жамоадоши тарафини олиб, уни жаҳоннинг энг яхши форвардларидан бири деб атаган ва танқидлар Игуаиннинг қалбини жароҳатлаганини айтган.

Ҳозирда ҳам Лаутаро жамоадошлари томонидан қўллаб-қувватлангани туфайли чоракфиналда Нидерландияга қарши ўйин бахтли якун топди. Қолаверса, жамоадагилар оммадан фарқли ўлароқ турнир гуруҳ ўйинларида оғриқни қолдирувчи укол билан ҳаракат Лаутаронинг вазиятидан (бу ҳақда унинг агенти расман хабар қилган) хабардор эди.

Мартинес чоракфинал ўйини арафасида оғриқ йўқолгани ва ўзини яхши ҳис этаётганини айтди. Яъни энди ундан тўлиқ ҳисоб сўраш мумкинлигини билдирди. Журналист ва мухлислар у аввалгни ўйинларда йўққа чиқарган вазиятларни санашга киришиб кетди. Нидерландлар билан ўйиннинг овертаймида ҳам навбатдаги шундай вазият рўй берди, аммо бу Лаутарони синдириб қўймади ва пеналтилар сериясига айнан у аниқ зарба билан якун ясади.

Саудияга қарши биринчи тур ўйинида бўшашган ва ўз кучига юқори баҳо бериб ўйнаган Аргентина — ҳал қилувчи ўйинларда жаҳлдор тўдага айланди. Жамоа футболчилари Луи ван Гаалнинг матбуот анжуманида айтган сўзларидан жаҳл отига минишди. Мураббий ўшанда нидерландлар устунликка эга бўлиши мумкинлиги, Месси тўпни йўқотса, ўйинда фаол иштирок этмаслиги, сардор ёпиб қўйилса рақиб жамоа футболчилари ўртамиёна жамоага айланиб қолишини айтганди.

Якунда эса Лео голли пас ҳам берди, гол ҳам урди ва ван Гаал, ҳакамлар ҳамда Вегҳорст ҳақида нимани ўйлаган бўлса ташқарига чиқарди. Мухлислар бунга қадар Мессини шундай ҳолатда кўрганмиди? Ва бу ўйин вақтида ва ундан кейин ғазабини тийиб ўтирмаган биргина у эмасди. Эмилиано Мартинес ўз смартфонига ван Гаалдан иқтибосни ёзиб олганини ва ҳар куни унинг шу гапларини ўқиб, ўйинга тайёрланганини тан олди. Рақиб мураббийининг версиясига кўра, пеналтилар сериясида нидерландларда устунлик бўлиши керак эди. Серияда жанубий америкаликлар устун келгач дарвозабон рақиб захира ўриндиғи томон ишоралар қилишда ўзини тийиб ўтирмади ва ван Гаалнинг ёрдамчиси — Эдгар Давидсга жим бўлишни таклиф этди.

Бу ҳаддан ташқари беадабликми? Кимдир шундай дейиши ва пеналтилар сериясида мағлуб бўлган бразилларни юпатган Лука Модрич билан солиштириши мумкин. Аргентиналиклар эса Лаутаро томон чопаётиб, таслим қилинган рақиб томонга турли қилиқлар кўрсатиб кетишди. Отамендининг версиясига кўра, бу рақибнинг сериядаги ҳар бир зарбани амалга оширишдан олдинги провокацияларига реакция бўлган. Трибуналар остида Вегхорст билан даҳанаки тортишув юзага келганида эса Серхио Агуэро ҳам вазиятга аралашди.

Бу Аргентина ўз сардори учун муштлашувга тайёр. Бугунги жамоа учун Месси ўтган асрдаги Диего Марадона мақомида. Афсона ўлимига икки йил бўлган куни Лаутаро шундай деганди: «Умид қиламанки, биз уни хурсанд қиламиз». Месси эса чоракфиналдаги ғалабадан кейин тан олди: «Диего бизни кузатиб турибди. У бизни олдинга ундамоқда ва умид қиламанки, охирига қадар шу руҳда давом этамиз».

Мавзуга оид

Эълонлар