Мирзиёев, Тўқаев ва Муҳаммад Салоҳ: «Жаҳоннинг энг обрўли 500 мусулмонлари» рўйхатига яна кимлар кирди?

Иордания пойтахти Аммон шаҳридаги исломий тадқиқотлар қироллик маркази «Жаҳоннинг энг обрўли 500 мусулмонлари» рейтингини эълон қилди. Ўзбекистон президенти илк марта бу рўйхатдан ўрин олди.

Фото: Kun.uz

Авваллари бу рўйхатга киритилмаган Ўзбекистон президенти Шавкат Мирзиёев 139-ўринда қайд этилган.

Сўнгги 7 йилда рейтингдан муқим ўрин олиб келган Тожикистон президенти Имомали Раҳмон бу сафар рўйхатдан ўрин олмаган. Сўнгги марта унга 133-ўрин берилган эди. Тожикистондан рўйхатга мамлакатнинг бош муфтийси Сайидмукаррам Абдулқодирзода киритилган ва 146-ўринда қайд этилган.

Рўйхатдан шунингдек Қозоғистон президенти Қосим-Жўмарт Тўқаев ҳам жой олган ва 183-ўринга қўйилган. Қозоғистонлик машҳур қўшиқчи Димаш Худойберган 138-ўринда.

Афғонистондаги толиблар ҳукумати раҳбари Ҳайбатуллоҳ Охунзода ҳам рўйхатга киритилиб, 49-ўринга жойлаштирилган.

Рейтингда биринчи ўринда Саудия Арабистони қироли Салмон ибн Абдулазиз Ол Сауд қайд этилган. У ҳар йилги ҳажни ташкил қилиш ва бутун дунёдан миллионлаб зиёратчилар учун қайғуришга масъул.

Иккинчи ўриндан Эроннинг олий раҳнамоси Али Хоминаий, учинчи ўриндан эса Қатар амири Тамим ибн Ҳамад Ол Соний жой олган.

Тўртинчи ўрин Туркия президенти Ражаб Тоййиб Эрдўғанга берилган.

Мисрлик таниқли футболчи Муҳаммад Салоҳ 39-ўринга лойиқ кўрилган.

#Имомали Раҳмон #Муҳаммад Салоҳ #Шавкат Мирзиёев