Сирдарёда қуввати 1500 мегаваттли янги иссиқлик электр станцияси қурилмоқда

Саудия Арабистонининг “ACWA Power” компанияси 100 фоиз тўғридан тўғри инвестициялар ҳисобига амалга ошираётган мазкур лойиҳа 2023 йил якунига қадар ишга туширилиши режалаштирилган.

Фото: Видеодан кадр

Сирдарёда янги иссиқлик электр станцияси барпо этилмоқда. Бу ҳақда Энергетика вазирлиги ахборот хизмати хабар бермоқда.

Мазкур лойиҳа Саудия Арабистонининг “ACWA Power” компанияси томонидан 100 фоиз тўғридан тўғри инвестициялар ҳисобига амалга оширилмоқда. Станция йилига 12 млрд кВт соат электр энергия ишлаб чиқаради. Лойиҳа доирасида энг замонавий, энергия тежамкор технологиялардан фойдаланилиши ҳисобига йилига 1,1 млрд куб метр табиий газ тежалишига эришилиши кутилмоқда.

Станция Ширин шаҳри ва Боёвут туманлари ҳудудида 55 гектар ер майдонида қурилиши ва 2023 йил якунига қадар ишга туширилиши режалаштирилган.

Бугунги кунда лойиҳа 44 фоизга, хусусан лойиҳалаштириш 90 фоиз, буюртмалар 64 фоиз, қурилиш ишлари 17 фоизга бажарилган.

Аввалроқ, жорий йилнинг дастлабки беш ойи давомида умумий қуввати 1 минг 154 мегаватт бўлган 5та иссиқлик ва қуввати 100 мегаватт бўлган 1та қуёш фотоэлектр станцияси ишга туширилгани маълум қилинганди.

#Сирдарё #иссиқлик электр станцияси