Ўзбекистонга Нидерландиядан 5 бош божхона итлари олиб келинди

Хориждан олиб келинган 3 бош Бельгия ва 2 бош немис овчаркаси Афғонистон ҳамда Тожикистон билан чегарада жойлашган божхона постларида хизматга сафарбар қилиниши кутилмоқда.

Фото: Давлат божхона қўмитаси ахборот хизмати

Ўзбекистон Республикаси Давлат божхона қўмитаси ҳамда Жаҳон божхона ташкилоти ўртасидаги фаол ҳамкорлик доирасида Тошкент халқаро аэропортига Истанбул-Тошкент рейси билан 3 бош Бельгия ва 2 бош немис овчаркаси олиб келинди.

Давлат божхона қўмитаси ахборот хизматининг хабар беришича, мазкур итлар Нидерландиянинг Police Dogs Centre ташкилоти томонидан Миллий кинология марказига беғараз тарзда тақдим қилинган.

Қайд этилишича, мазкур лойиҳа БМТнинг гиёҳванд моддалар устидан назорат қилиш ва жиноятларнинг олдини олиш бошқармасининг Марказий Осиёдаги минтақавий ваколатхонаси томонидан амалга оширилган.

Маълум қилинишича, ҳозирда Нидерландиядан келтирилган 5 бош хизмат итлари махсус питомникларга жойлаштирилган. Белгиланган карантин муддати ва иқлимга мослашиш жараёнлари якунига етгач, ушбу итлар Афғонистон ва Тожикистон билан чегарада жойлашган божхона постларида хизматга сафарбар қилинади.

#божхона #кинология