Коррупцияга қарши курашиш агентлиги Жиззахдаги 2 млрд сўмлик давлат буюртмаси билан боғлиқ ҳолатни ўрганишни бошлади

Қайд этилишича, давлат харидлари соҳасидаги шартномаларнинг очиқ маълумотлар порталида эълон қилиниши натижасида тизим шаффофлашди. 

“Бундан ташқари оммавий ахборот воситалари, блогерлар ҳамда фаол фуқаролар саъй-ҳаракатлари туфайли мазкур соҳадаги коррупцион ва манфаатлар тўқнашуви акс этган бўлиши мумкин бўлган ҳолатлар ҳам юзага чиқмоқда. 

Жумладан, Жиззах вилояти ҳокимлиги Ягона буюртмачи хизмати инжиниринг компанияси Жиззах шаҳрини ободонлаштириш мақсадида ўтказган танлови масаласи қатор муҳокамаларни келтириб чиқарди. 

Коррупцияга қарши курашиш агентлиги ўз ваколатлари доирасида мазкур ҳолат бўйича ўрганишни бошлади. Ўрганишлар натижалари бўйича ОАВ ва кенг жамоатчиликка батафсил маълумот берилади”, - дейилади хабарда.

Бундан ташқари, агентлик томонидан давлат харидлари соҳасида учраётган тизимли қонунбузилиш ҳолатлари таҳлилидан келиб чиққан ҳолда, мазкур жараёнда юзага келаётган коррупцион ҳолат ва манфаатлар тўқнашувини тартибга солувчи ва жавобгарликни кучайтиришни назарда тутадиган таклифлар ишлаб чиқилаётгани маълум қилинди. 

Аввалроқ, Жиззах шаҳрини кўркам қиёфага келтириш ва гуллар экиш бўйича 2 миллиард сўмдан ортиқ иккита давлат буюртмасини қўлга киритган корхона вилоят ҳокимининг қизига қарашли бўлиши мумкин экани маълум қилинганди.