O‘zbekiston va Koreya temiryo‘l sohasida qo‘shma loyihalar amalga oshiradi

Transport vazirligi ma’lumotiga ko‘ra, tomonlar sohaga oid zamonaviy texnologiyalar va temiryo‘l tizimini modernizatsiya qilish uchun innovatsion hamkorlikni kengaytirish imkoniyatini muhokama qildi.

Respublikada qurilishi rejalashtirilayotgan yangi yo‘nalishlarda tezyurar poyezdlar harakati xavfsizligini oshirishga xizmat qiluvchi zamonaviy signalizatsiya, geolokatsiya va harakatni boshqarish tizimi hamda Koreya navigatsiya yechimini joriy etishga alohida e’tibor qaratildi.

Koreya milliy temiryo‘l idorasi bosh direktori Li Son Xe "Toshkent – Samarqand" alohida tezyurar yo‘nalishi loyihasining texnik-iqtisodiy asosini tayyorlash jarayoni haqida ham ma’lumot berdi.

Tayyorgarlik ishlari Korea Eximbank granti ko‘magida Saman Engineering, Dong Meong Engineering Consultans & Architecture Co., Ltd, Korea Railroad Corporation va Korea National Railway kompaniyalari konsorsiumi tomonidan birgalikda olib borilishi ma’qullandi.