Xonanda Botir Qodirov mualliflik huquqini buzgani uchun jarimaga tortildi

Sud Botir Qodirovni o‘z ijodida «Davlating borida», «Omonat» va «Tingla do‘stim» nomli she’rlardan huquq egasi ruxsatisiz hamda mualliflik haqini to‘lamasdan foydalangan deb topdi. Adliya vazirligiga shikoyat qilgan shoir Shamsiddin To‘rayev xonandadan BHMning 1000 baravarigacha tovon talab qilishi mumkin.

Xalq orasida «Shamsiddin Sadoiy» taxallusi bilan tanilgan shoir Shamsiddin To‘rayev xonanda Botir Qodirov ustidan Adliya vazirligiga shikoyat qildi. Bu haqda vazirlik axborot xizmati xabar berdi.

Adliya vazirligi shoirning murojaati asosida xonanda Botir Qodirov tomonidan «Davlating borida», «Omonat» va «Tingla do‘stim» nomli she’rlari huquq egasi ruxsatisiz hamda tegishli tartibda mualliflik haqini to‘lamasdan foydalanilganini aniqlagan.

Holat yuzasidan huquqbuzar xonandaga nisbatan Ma’muriy javobgarlik to‘g‘risidagi kodeksning 177-1-moddasi – «Mualliflik huquqini va turdosh huquqlarni buzish» ma’muriy huquqbuzarligi yuzasidan bayonnoma rasmiylashtirilib, tegishli sudga yuborilgan.

Jinoyat ishlari bo‘yicha Chilonzor tuman sudining qaroriga ko‘ra, huquqbuzarga nisbatan MJtK 177-1-moddasi birinchi qismi bilan BHM 5 baravari miqdorida – 1 million 875 ming so‘m jarima jazosi tayinlandi.

Ma’lum qilinishicha, avvalroq shoir Shamsiddin To‘rayevning «Ishqingda kuygan» she’rini xonanda Yulduz Turdiyeva ham uning ruxsatisiz kuylab kelgan. Shoir adliya vazirligiga murojaat qilgach, tomonlar kelishuvga erishgan.

Adliya vazirligining eslatishicha, «Mualliflik huquqi va turdosh huquqlar to‘g‘risida»gi qonunning 65-moddasiga ko‘ra, muallif yoki mutlaq huquqlarning boshqa egasi huquqbuzardan zarar qoplanishi o‘rniga BHMning 20 baravaridan 1000 baravarigacha (375 million so‘m) tovon to‘lashni talab qilishga haqli.

#Botir Qodirov #ma’muriy javobgarlik