O‘zbekistonda birinchi raqamli elektr stansiyasi qurilishi yakunlandi

Polshaning Strefa Biznesu va PAP elektron portallarida "Energetika tizimini raqamlashtirish: O‘zbekistonda birinchi raqamli elektr stansiyasi qurilishi muvaffaqiyatli yakunlandi" sarlavhali maqola e’lon qilindi.

"Shanghai Electric kompaniyasining O‘zbekistondagi birinchi raqamli qurilmasi bo‘lgan 220 kV kuchlanishli "Zafarobod" raqamli podstansiyasining qurilishi muvaffaqiyatli yakunlanib, foydalanishga topshirildi. Ushbu zamonaviy podstansiya Jizzax viloyatida joylashgan bo‘lib, qariyb 75 ming kvadrat metr maydonni egallaydi va O‘zbekiston sharqida energiya ta’minotini sezilarli darajada yaxshilashga qaratilgan", – deb ta’kidlangan nashrlarda

Qayd etilishicha, "Zafarobod" raqamli podstansiyasi to‘liq ishga tushgach, hududiy elektr tarmoqlarini mustahkamlash va mamlakatda energiya taqsimotini yaxshilashda muhim rol o‘ynaydi. 400 megavatt quvvatga ega yangi inshoot Jizzax viloyatini elektr energiyasi bilan ta’minlashni samarali ikki barobarga oshiradi, yaqin atrofdagi sanoat korxonalari va aholi turar joylarini barqaror energiya bilan ta’minlaydi.

Podstansiya Shanghai Electric kompaniyasi tomonidan ishlab chiqilgan 250 MVA quvvatga ega ikkita avtotransformator bilan jihozlangan. Ular Jizzax viloyatini ishonchli va sifatli elektr energiyasi bilan ta’minlashni kafolatlaydi, shuningdek, bu jadal rivojlanayotgan hududning tobora ortib borayotgan talabini qondiradi.

"Zafaroboddagi eng muhim va innovatsion sarmoya konsepsiyasi podstansiyaning samaradorligi va xavfsizligini sezilarli darajada oshiradigan to‘liq raqamli tizimni joriy etish hisoblanadi. Podstansiya zamonaviy monitoring va ma’lumotlarni yig‘ish tizimlari bilan ham jihozlangan bo‘lib, bu joylarda texnik xizmat ko‘rsatuvchi xodimlarga bo‘lgan ehtiyojni kamaytiradi va ish xavfsizligini oshiradi", – deb yozgan Polsha OAV.