«Qotil» asteroid endi Yer uchun xavf tug‘dirmaydi

NASA tomonidan tuziladigan tahdidlar jadvalida birinchi o‘rinni egallagan 2024 YR4 asteroidi endi sayyoramiz uchun rasman xavfsiz deb e’lon qilindi. Olimlarning fikricha, uning orbitasiga aniqlik kiritilgandan so‘ng, 2032 yilda Yer bilan to‘qnashuv ehtimoli 1/20000 nisbatga tushib qoldi, bu «Torino shkalasi» bo‘yicha nolga to‘g‘ri keladi.

Asteroid 2024 yil dekabrida topilgan va dastlab to‘qnashuv ehtimoli 1/32 nisbatda berilgan, bu uning maqomini «Torino shkalasi» bo‘yicha uchinchi darajaga ko‘targan edi. Bu esa asteroidni tarix davomida kuzatilgan eng xavfli obektga aylantirdi. Biroq, keyingi ma’lumotlar astronomlarga uning trayektoriyasini qayta hisoblash imkonini berdi.

2024 YR4 bilan Yerning to‘qnashish ehtimoli endi «Torino shkalasi» bo‘yicha nol darajaga tushdi, ya’ni hech qanday xavf yo‘q.

Xavf yo‘qligiga qaramay, asteroid hali ham olimlarni qiziqtirmoqda. 2028 yilda u Yerdan 8 million kilometr masofada uchib o‘tadi va 2032 yilda u taxminan 270 ming kilometrga yaqinlashadi - bu Oyga qaraganda yaqinroqdir. Ushbu yaqinlashuv tadqiqotchilarga obektni batafsil o‘rganish imkonini beradi.

Mutaxassislarning ta’kidlashicha, to‘qnashuv xavfini dastlabki ortiqcha baholash yangi asteroidlar kashf etilganda tez-tez uchraydigan hodisadir. Yangi ma’lumotlar paydo bo‘lishi bilan ularning orbitalari yangilanadi va odatda falokat ehtimoli kamayadi. Ushbu holat zamonaviy kuzatuv tizimlari o‘z vazifalarini muvaffaqiyatli bajarayotganini va shu bilan insoniyat xavfsizligini oshirayotganini tasdiqladi.