Туркия биринчи сузувчи газ платформасини очиқ денгизга юборди

«Усмон Ғози» номини олган платформа 2026 йилдан ишга тушади ва битта нуқтада камида 20 йил фаолият юритади. Қайта ишлаш бўйича лойиҳавий қувват суткасига 10,5 млн куб метр газни ташкил этади.

Фото: Anadolu Agency

Туркияда табиий газ қазиб олиш бўйича мамлакат тарихидаги биринчи сузувчи платформ Қора денгизга йўл олди, деб хабар бермоқда Anadolu.

Тантанали маросимда президент Ражаб Тоййиб Эрдўған ҳам иштирок этди. «Усмон Ғози» номли махсус кема 2026 йилдан бошлаб газ қазиб олишни бошлайди.

Платформа Сакаря газ кони томон йўл олмоқда. 2026 йил ўрталарида «Усмон Ғози» ишга тушиб, кунига 20 миллион куб метр газ билан таъминлаши кутилмоқда — бу ҳозирда қазиб олинаётган газ ҳажмидан қарийб икки баробар кўп. Платформа битта нуқтада камида 20 йил хизмат кўрсатади.

Кема узунлиги 298,5 метрни, эни эса 56 метрни ташкил этади. Экипажи 140 кишигача етиши мумкин.

Қайта ишлаш бўйича лойиҳавий қувват суткасига 10,5 миллион куб метр, узатиш қуввати эса 10 миллион куб метр газни ташкил этади. Қайта ишланган газ 161 километрли қувурлар орқали қуруқликка етказилиб, Туркия миллий газ тармоғига узатилади.

Лойиҳа Туркиянинг энергетик мустақиллигини мустаҳкамлаш ва импортга бўлган қарамликни камайтириш стратегияси доирасида амалга оширилмоқда.

«Усмон Ғози» платформаси Босфор кўрфазидан 11 соатда ўтиши ва 1 июнда Филёс портига етиб бориши кутилмоқда.

#Туркия #газ