Трамп жамоаси учинчи эҳтимолий импичментга тайёргарликни бошлади

Трампнинг маслаҳатчилари келаси йилги сайловлардан сўнг демократлар Вакиллар палатасида кўпчилик ўринни қўлга киритса, унга учинчи марта импичмент эълон қилиниши эҳтимолига тайёргарлик кўрмоқда, деб ёзди Axios. Шу туфайли, Трамп маъмурияти оралиқ сайловларгача ўз таклифларини Конгресс орқали имкон қадар кўпроқ илгари сурмоқчи.

Демократлар ҳозир Вакиллар палатасини назорат қилмайди, бироқ бу 2026 йил ноябрида бўлиб ўтадиган оралиқ сайловлардан кейин ўзгариши мумкин. Демократик партия вакиллари аллақачон Трампга импичмент эълон қилиш нияти ҳақида гапирмоқда - хусусан, Мичиган штатидан конгрессмен Шри Танедар бу ҳақда 28 апрель куни маълум қилган.

Шу туфайли, Трамп маъмурияти оралиқ сайловлар олдидан Конгресс орқали имкон қадар кўпроқ таклифларини, айниқса солиқларни камайтириш режаларини илгари суришга ҳаракат қилади, деб ёзди Axios. “Биз солиқларни камайтиришимиз ва рецессиядан қочишимиз керак», деди Трамп сайловолди ташвиқотчиси Жон Маклафлин нашрга.

АҚШ молия вазири Скотт Бессент ҳам аввалроқ импичмент таҳдиди ҳақида гапирган эди.

«Бу ерда ҳақиқий хавф шундан иборатки, агар биз оралиқ сайловларда ютқазсак... [Вакиллар палатасидаги демократлар] дарҳол бизга бирор нарса учун импичмент эълон қилишга шошилишади», деди у.

Трамп АҚШ тарихида икки марта импичмент эълон қилинган ягона президентдир.

«Трамп ва унинг жамоаси бу жараён Оқ уйга қанчалик оғир юк бўлиши ва президентнинг режаларига қандай тўсқинлик қилиши мумкинлигини яхши билади», деб таъкидлади Axios.

Бироқ Трампнинг маслаҳатчиларидан бири АҚШ президенти аллақачон бу жараёндан муваффақиятли ўтганини таъкидлади. «Оҳ, импичмент! (...) Улар буни аллақачон икки марта эълон қилишди ва бу ҳеч нарсага олиб келмади», деди у.

АҚШ президентига импичмент эълон қилиш учун Вакиллар палатасида оддий кўпчилик овоз талаб қилинади, бироқ президентни лавозимидан четлатиш учун 100 сенатордан 67 нафари ёқлаб овоз бериши керак, бу тарихда ҳеч қачон бўлмаган.