Хитой атом энергетикаси соҳасида дунёда етакчига айланди

Хитой АЭС қуввати бўйича дунёда биринчи ўринни эгаллади. Бу ҳақда CNEA’нинг «Хитой—2025 ядровий энергетикани ривожлантириш тўғрисидаги ҳисобот»ида сўз боради.

Қайд этилишича, бугунги кунда Хитойда умумий қуввати 113 миллион киловаттга тенг 102 та атом энергоблокидан фойдаланилмоқда, қуриляпти ва қуришга рухсат берилган. 

2024 йилда Хитойда атом энергетикаси ишлаб чиқариши 444,7 миллиард киловаттга етган, бу кўрсаткич билан у дунёда иккинчи ўринни эгаллаган ва мамлакат умумий электр энергияси ишлаб чиқариш ҳажмининг 4,72 фоизини ташкил этган.

Таъкидланишича, ҳозирги вақтда Хитойда умумий ўрнатилган қуввати 33,65 миллион киловаттга тенг 28 та атом энергия блокининг қурилиши олиб борилмоқда ва қурилаётган энергия блоклари ўрнатилган қуввати бўйича Хитой кетма-кет 18 йилдан бери дунёда етакчилик қилиб келяпти.

2023 йил июн ойида Хитойда илк бор торий реактори ишга туширилган. South China Morning Post’нинг ёзишича, Хитойнинг Ядро хавфсизлиги бўйича давлат бошқармаси мамлакатдаги илк 2 мегаваттли торий реакторини ишга тушириш учун рухсат берган.

Таъкидланишича, Хитойда торий захиралари жуда катта ва айрим баҳолашларга кўра, бу ресурс мамлакатнинг умумий энергетик эҳтиёжларини 20 минг йилдан ортиқ муддат давомида қондира олади.