Вашингтонда бортида конгрессменлар бўлган икки самолёт тўқнашиб кетди

Ҳодиса Роналд Рейган номидаги аэропортда юз берган. Ҳар икки ҳаво кемаси ҳам техник кўрикка юборилган.

Фото: REUTERS

10 апрел куни Вашингтонда жойлашган Роналд Рейган номидаги аэропортда American Airlines’нинг икки самолёти бир-бири билан тўқнашиб кетди, деб хабар беради Reuters.

Маълумотларга кўра, ҳаво кемаларидан бирининг бортида АҚШ Конгрессининг камида уч нафар аъзоси бўлган. The Washington Post эса ҳар икки рейсда ҳам камида беш нафар конгрессмен бўлганини ёзди. Хусусан, Ню Йоркдан сайланган демократлар Грегори Микс ва Грейс Мен, вакиллар палатаси аъзолари Жос Готтаймер ва республикачи Ник ЛаЛота.

Ҳодиса самолётларнинг ҳаракатланиш йўлагида содир бўлган: Bombardier CRJ 900 қаноти билан Embraer E175ʼга урилган. Иккала ҳаво кемаси ҳам техник кўрикка юборилган. Аэропорт фаолиятида узилишлар рўй бермаган.

Қайд этилишича, бу сўнгги кунларда АҚШ самолётлари билан юз берган иккинчи ҳолатдир. 7 апрел куни Орегонда хусусий самолёт учиш-қўниш йўлагидан чиқиб кетиб, сувга қулаган. Ҳодиса оқибатида беш киши жароҳат олган.

Шунингдек, 10 апрел куни Ню Йорк яқинидаги Жерси-Сити шаҳрида вертолёт Гудзон дарёсига қулаши оқибатида олти киши — Siemens концернининг Испаниядаги филиали раҳбари Агустин Эскобар, унинг рафиқаси ва уч нафар фарзанди ҳамда учувчи ҳалок бўлган.

#АҚШ #самолёт