Трамп ва Путин мулоқоти: баёнотларга қараб, қандай хулосалар қилиш мумкин?

18 март куни бутун дунё кутаётган телефон қўнғироғи бўлиб ўтди: Украинадаги урушни тугатишни ваъда қилаётган АҚШ президенти россиялик ҳамкасбига қўнғироқ қилди. Хўш, улар нималарни муҳокама қилишди? Дастлабки хулосалар қанақа? Kun.uz'нинг “Геосиёсат” дастурида таҳлилчилар Ойбек Сирожов ва Камолиддин Раббимов ўз фикрлари билан ўртоқлашди.

— Трамп ва Путин мулоқоти реал ҳақиқатда самарали ўтди дейиш мумкинми?

Ойбек Сирожов: Икки томон ҳам 2 соатдан ортиқ давом этган мулоқотни ижобий баҳолади. Айниқса, Трамп жамоаси матбуот анжуманида Путин билан бўлган суҳбатни юқори баҳолади. Музокарада кўтарилган барча мавзулар ҳам оммага очиқланмайди. Одатда воқеаларнинг кейинги ривожига қараб музокаралар мазмуни ва руҳини таҳлил қилиш мумкин.

Умумий олиб айтганда, бу мулоқотни тинчликка эришиш томон конструктив баҳолайман.

— Трамп ва Путин бирор аниқ шартларда ваъдалашдими?

Камолиддин Раббимов: Суҳбат вақти ва томонларнинг баёнотларига эътибор берсак, мулоқот анчагина оғир ўтган. Ўзаро илиқ мулозаматлар бўлгандир, лекин Путин томонидан қўйилган шартлар тўлиқ қабул қилинмагани аниқ.

Суҳбатдан кейинги баёнотларга қарасак, 175-175 форматида асирларни алмаштириш ҳақида келишув бор, лекин асосий стратегик нуқталарда, жумладан урушни тўлақонли тўхтатиш масаласида аҳдлашув бўлмади. Чунки Россия томони Украинани қуроллантириш, разведка маълумотлари узатиш кабиларни тўхтатиш шартини қўйяпти. Лекин бундай талаблар Россия томонига ҳам айтилгани ҳақида АҚШнинг баёнотида ҳеч қандай банд йўқ. Икки томон ҳам ўз шартларини айтиб, вазиятни оҳиста пайпаслаб кўряпти.

Менимча, мулоқотдаги энг муҳим нуқта – АҚШ-Россия биргаликда доимий ишчи гуруҳ тузиши бўлди. Бу ишчи гуруҳнинг иши ҳам жуда чигал бўлади, чунки Путин қўйган энг оғир талаб – Украинанинг НАТОга қўшилмаслиги бўйича кафолат берилиши, Украинанинг ҳарбий контингенти чекланиши кераклиги, умуман олганда, Украина Россия орбитасида бўлиши. Ўйлайманки, бу шартларга Европа ҳам, Трамп маъмурияти ҳам рози бўлмаса керак.

Суҳбат давомида сиёсатшунослар 30 кунлик энергетик тузилмаларга ҳужум қилмаслик келишуви, Россия талабларининг мунозарали нуқталари, РФнинг Қора денгиздаги кемалар хавфсизлигига интилиши, шунингдек, тинчликка эришиш жараёнларида Украинанинг ўзи ва Европанинг иштирокини ҳам муҳокама қилишди.

Суҳбатни тўлиқ шаклда видео орқали томоша қилишингиз мумкин.

НормуҳаммадАли Абдураҳмонов суҳбатлашди.