Трамп: «Украинага босим ўтказишга мажбур бўлгандик»

17 март куни АҚШ президенти Доналд Трамп Вашингтондаги Кеннеди марказига бориб, журналистлар билан гаплашди. Бу ўзига хос сиёсий пиар бўлиб, унда шунчаки Трамп АҚШнинг 35-президенти Жон Фиджерелд Кеннеди ўлдирилишига оид янги ҳужжатлар очиқланишини эълон қилиши керак эди.

Чиндан шундай бўлди. Трамп Жон Кеннеди, унинг акаси Роберт Кеннеди ва ҳуқуқ ҳимоячиси Мартин Лютер Кинг ўлдирилишига оид янги 80 минг саҳифа ҳужжатлар эълон қилинишини билдирди. Трамп сайлов кампанияси доирасида бу ҳужжатларни очиқлашга ваъда берганди.

Эксперт-таҳлилчилар Кеннеди ўлдирилишига оид ҳужжатларни ўрганиш учун стартда туришибди. Улар нимадир қизиқ нарса аниқлашса, бу ҳақда алоҳида гаплашармиз. Ҳозир эса бошқа нарсага эътиборингизни қаратмоқчимиз. Трамп Кеннеди марказига ташриф доирасида журналистлар билан мулоқот қилди. Унда АҚШ президенти россиялик ҳамкасби Путин билан бўлажак суҳбати ва Украинадаги уруш ҳақида қизиқ гапларни айтди.

Хусусан, Трамп Оқ уйдаги Зеленский билан тортишув ҳақида гапирди. ОАВда Трамп Зеленскийга босим ўтказиш унинг стратегияси бўлганини айтди, деган қизиқ хабар тарқалди. Шу хабар қанчалик асосли эканини аниқлаш учун Трампнинг матбуот анжуманини диққат билан ўргандик. Шу ўринда фондаги қандайдир шовқин сабаб видеода овоз жуда ёмон ёзилгани, журналистларнинг овози деярли эшитилмаганини таъкидлаш керак.

«Босим ўтказишга мажбур эдик»

Ҳозирдан айтиб қўяй, Трамп Зеленскийга босим ўтказиш менинг стратегиям эди, деб айтгани йўқ. Қаердадир шундай хабарга кўзингиз тушса, билингки, бу – фейк. Трамп чиндан мана шунга ўхшаш мазмунда гапиргани рост, лекин АҚШ президенти айтмаган гапни унинг оғзидан чиқди деб эълон қилиш ярамайди.

Демак, гап нимадан бошланди? Журналистлардан бири Трампга Украина АҚШ ҳарбий ва разведка ёрдамини тўхтатгани ортидан Курскдан чиқиб кетмадими, деб сўради. Трамп эса бундай эмаслигини айтиб, кейин бирдан Оқ уйдаги жанжални эслади: «Биз Украинани тўғри ҳаракат қилишга ундашимиз керак бўлди, чунки вазият жуда оғир эди. Овал кабинетда бироз тортишув бўлганини кўрдингиз, лекин менимча, Украина ўшандан кейин тўғри ҳаракат қила бошлади. Энди биз аввалига ўт очишни тўхтатиш, кейин тинчлик келишувига эришмоқчимиз».

Яъни Трамп Украинага босим қилишга мажбур бўлгани, шу тариқа Киев сулҳга рози бўлганини айтди. Лекин Зеленский билан жанжаллашиш унинг стратегияси бўлгани ҳақида гапиргани йўқ. Эсингизда бўлса, 28 феврал куни содир бўлган ўша жанжалдан кейин вице-президент Вэнс Зеленский билан тортишувни атай уюштиргани ҳақида хабарлар чиққан, бир қатор сиёсатчилар ҳам шунга ишора қилганди.

Яна қуршов ҳақида

Бу гал ҳам Доналд Трамп украин қўшини Курскда қуршовда қолгани ҳақида гапирди. Ваҳоланки, Киев Курскдан ҳеч қандай гуруҳи қуршовда эмаслиги, бу Москва тарқатаётган фейк экани ҳақида баёнот берганди.

«Эртага эрталаб қийин аҳволдаги аскарларни қутқариш учун президент Путин билан гаплашаман. Улар Россия ҳарбийлари томонидан қуршаб олинган. Бу ҳақда алоҳида матбуот анжумани ўтказиб кўп гапларни айтиб бераман, чунки бу жуда катта келишув бўлди», деди Трамп. Шунингдек, АҚШ президенти мен бўлмасам Курскда украин қўшинлари аллақачон ўлиб кетган бўларди, деб қўшимча қилди.

Маълумот учун, Доналд Трамп ва Владимир Путин бугун, Тошкент вақти билан соат 20:00 атрофида телефон орқали мулоқот қилиши кутилмоқда. Биз бу суҳбат тафсилотлари ҳақида видео эълон қиламиз.

Ўткир Жалолхонов тайёрлади.
Тасвирчи ва монтаж устаси – Фахриддин Ҳотамов.