Tesla акциялари қиймати бир кунда 15 фоизга тушиб кетди

10 март, душанба куни Илон Маскнинг Tesla компанияси акциялари 15 фоиздан кўпроққа тушиб кетди, бу Доналд Трампнинг 2024 йил ноябрида бўлиб ўтган АҚШ президентлик сайловларида ғалаба қозонганидан бери эришилган барча ўсиш кўрсаткичларини йўққа чиқарди, деб хабар беради dpa.

Tesla акциялари нархи декабр ойи ўрталарида энг юқори чўққисига чиқди, ўшанда компания акциялари 480 долларга баҳоланган эди – бу Илон Маск фаол иштирок этган Трампнинг сайловолди кампанияси давридагидан икки баравар юқори. Ҳозирда ҳар бир акция учун 222 доллар атрофидаги курсда Tesla'нинг умумий қиймати 1,5 триллион доллардан 715 миллиард долларга тушиб кетди. Таққослаш учун, Америка автомобил гиганти Ford'нинг бозор қиймати 40 миллиард доллар атрофида, General Motors эса - 48 миллиард атрофида, дея хабар беради dpa.

Маскнинг шахсий бойлиги Tesla акциялари нархига боғлиқ

Агентликнинг қайд этишича, Tesla акциялари нархининг кескин тушиши Илон Маскнинг ўзига ҳам муаммо туғдириши мумкин. Чунки миллиардер ўз компаниясининг акцияларидан гаров сифатида фойдаланиб, кредит олиши билан танилган, у қоғозда дунёдаги энг бой одам саналади. Бироқ, агар акция баҳоси маълум даражадан пастга тушса, кредиторлар қўшимча гаров талаб қилиши мумкин. Bloomberg маълумотларига кўра, бугунги кунда Маскнинг бойлиги 300 миллиард доллардан ошади.