Baraka market тармоғи Pepsi эгалигига ўтади

Рақобат қўмитаси Pepsi савдо белгисига эгалик қилувчи «International Beverages Tashkent» компаниясига Baraka market супермаркетлар тармоғини сотиб олишга рухсат берган. Бу ҳақда қўмита ахборот хизмати хабар берди.

«Рақобат қўмитаси томонидан «International Beverages Tashkent» МЧЖ ХКнинг «Urban Retail» МЧЖ ХКнинг 100 фоиз улушларини олиш бўйича аризаси кўриб чиқилди.

«International Beverages Tashkent» МЧЖ ХК Pepsi, 7UP, Mirinda, Mountain Dew, Adrenaline Rush ва Lipton савдо белгилари остида салқин ичимликлар ишлаб чиқариш фаолияти билан шуғулланувчи ташкилот;

«Urban Retail» МЧЖ ХК Baraka market савдо белгиси остида супермаркетлар тармоғи орқали спиртсиз салқин ичимликлар, озиқ-овқат ҳамда ноозиқ-овқат маҳсулотлар савдоси билан шуғулланувчи ташкилот ҳисобланади.

Қўмитанинг махсус комиссияси томонидан ўтказилган таҳлил натижаларига кўра, мазкур битим корпоратив таркибий ўзгартириш ҳисобланиши ва тўғридан тўғри рақобат муҳитига таъсир кўрсатмаслиги бўйича хулосага келинди ва аризани қаноатлантириш ҳақида қарор қабул қилинди», дейилади хабарда.

Корхона ва ташкилотларнинг ягона давлат реестрига кўра, «Urban Retail» МЧЖ 2020 йилнинг июл ойида Тошкент шаҳрида рўйхатга олинган. Жорий устав фонди – 5 млрд сўм. Компаниянинг 99 фоиз улуши БААда рўйхатдан ўтган «Holten Enterprise Holdings Ltd» компаниясига, 1 фоиз улуши «Holten Group Corp»га тегишли. Раҳбари сифатида Николай Викторович Разумовский кўрсатилган.

Маълумот учун, «Holten Enterprise Holdings Ltd» ва «Holten Group Corp» мос равишда 99,9 фоиз ва 0,1 фоиз улуш билан «International Beverages Tashkent» таъсисчилари ҳам ҳисобланади.