Шолц - АҚШ ва Европанинг масъулияти ажратилишига қарши

Украинада хавфсизликни таъминлаш ва тинчликка эришиш масаласида «Европа ва Қўшма Штатлар ўртасида хавфсизлик ва масъулият тақсимоти бўлмаслиги керак», деди Германия канцлери Олаф Шолц 17 феврал, душанба куни Парижда Европа етакчиларининг бир неча соат давом этган саммитидан сўнг.

АҚШ президенти Доналд Трампнинг НАТО иттифоқчиларининг мудофаага кўпроқ сармоя киритиш талабига изоҳ берар экан, Шолц европаликлар ва америкаликлар жамоавий хавфсизлик бўйича ҳамкорлик қилишлари кераклигини яна бир бор таъкидлади. «НАТО биз доимо бирга ҳаракат қилишимиз ва хавфларни баҳам кўришимиз ва шу орқали хавфсизлигимизни таъминлашимизга асосланади. Буни шубҳа остига қўймаслик керак», — деди Шолц.

Шолц: Украинага тинчликпарвар кучларни юбориш бўйича баҳслар ғазаблантиради

Германия канцлери якуний тинчликни таъминлаш учун Украинага немис аскарларини юбориш бўйича давом этаётган мунозаралар «ўта ноўрин» ва «эрта» эканлигини яна бир бор таъкидлади. Россия ҳамон Украинага қарши «шафқатсиз уруш» олиб бормоқда ва эҳтимолий тинчлик қандай бўлишини ҳеч ким билмайди, дея тушунтирди у. «Бу нотўғри вақтда ва нотўғри мавзудаги ноўрин мунозара», деди канцлер.

«Ҳаттоки, бу баҳсдан бироз ғазабландим, буни очиқ айтмоқчиман. Бу ерда украиналикларни четлаб ўтиб, ҳали бўлиб ўтмаган тинчлик музокараларининг эҳтимолий натижалари муҳокама қилинмоқда. Очиғини айтсам, бу ўта ноўрин. Биз ҳали тинчликка эришганимиз йўқ, лекин Россия томонидан ҳеч қандай чекловсиз уруш олиб борилаётган ҳолатда, ҳеч қандай чекловсиз уруш ўртасида турибмиз».

«Европа учун вазият оғир. Биз Украинада тинчлик бўйича муҳокамани олқишлаймиз. Лекин бу мажбурий тинчлик ва Украина унга таклиф қилинган нарсани қабул қилиши керак дегани эмас. Биз буни Украина билан яқиндан мувофиқлаштирдик», деб ёзди Шолц саммит якунлари бўйича ижтимоий тармоқларда.