Ўзбекистон мевали боғларни барпо этиш бўйича Испания тажрибасини ўрганмоқда

Ишчи гуруҳ мевали боғ ва токзорларни барпо этиш, кўчат етиштириш ва уларни сертификатлаш тизими бўйича илғор тажрибани ўрганиш учун Мадрид, Сарагоса, Валенсия ва Мурсия провинцияларидаги компания ва ташкилотлар раҳбарлари музокаралар ўтказди.

Хусусан, IMIDRA ва ITUM илмий-тадқиқот марказларида виночилик ва узумчилик бўйича илмий ишланмалар, винобоп ва уруғсиз хўраки узум навларини селекция қилиш, етиштириш ҳамда турларни сақлаб қолиш тажрибаси ўрганилди. Делегация аъзолари XIX асрдан ҳозирги кунга қадар дунёнинг турли ҳудудларидан келтирилган ва селекция орқали яратилган янги узум навлари базаси билан таништирилди.

Калатаюд ҳудудидаги Viveros Veron ва Viveros Villanueva компанияларининг данакли мевалар ва узумчилик плантацияларига ташриф давомида кўчатчилик тажрибаси ўрганилди Viveros Veron вакиллари Ўзбекистонга мева кўчатларини етказиб бериш орқали маҳаллий фермерлар билан ҳамкорлик қилаётганини ва уни кенгайтиришдан манфаатдорлигини маълум қилди.  

Мурсия провинциясидаги Viveros of ITUMGRAPES фермер хўжалиги узумзорлар билан машҳур. Бу ерда етиштирилаётган юқори ҳароратга ва сувсизликка чидамли узум навлари Ўзбекистон вакилларига катта таассурот қолдирди.

Қишлоқ хўжалигида тежамкорлик ва самарадорликни оширишга кўмаклашувчи IТ қурилмалар ва дастурий платформаларни ишлаб чиқарувчи Odin Solutions компания раҳбарияти билан кечган мулоқот чоғида Агросаноатни ривожлантириш агентлиги ходимлари учун малака ошириш курсларини ташкил этиш юзасидан келишувга эришилди.

Ўзбекистон делегациясининг Валенсия ва Мурсия вилоятларига сафари давомида қишлоқ хўжалиги ва ирригация инфратузилмаларни барпо этиш йўналишида фаолият юритувчи Bombas Ideal, Azud, Hermisan компаниялари раҳбарлари музокаралари уюштирилди. Амалга оширилган лойиҳалар ўрганилди.

Испания томони Ўзбекистонда боғ ва узумзорлар ташкил этиш лойиҳаларида инновацион технологиялари билан қатнашишга қизиқиш билдирди. Bombas Ideal билан сув хўжалиги соҳасида мутахассислар тайёрлаш бўйича ҳамкорлик меморандумини имзолашга келишилди.

Мадрид шаҳрида Бутунжаҳон зайтун конгресси котибияти билан кечган учрашув чоғида Ўзбекистонда зайтунчиликни ривожлантириш, тажриба алмашиш, совуққа чидамли зайтун навларини етказиб бериш, пилот лойиҳаларини ишлаб чиқиш борасида ҳамкорлик масалалари муҳокама қилинди. Котибият вакиллари бу соҳада етакчи испан тадқиқот институтлари ва компаниялари иштирокида Ўзбекистонда илмий-амалий конференция ташкил этишни таклиф этди.

Viveros Jesús Poza ва Vefruber S.L. компаниялари раҳбарлари билан бўлиб ўтган музокараларда мевали боғ барпо этиш, кўчат етказиб бериш ва Ўзбекистонда етиштирилган маҳсулотларни Европа бозорига экспорт қилиш имкониятлари кўриб чиқилди.

Испан компаниялари раҳбарларининг 2025 йил биринчи чорагида Ўзбекистонга сафарини ташкил этиш, унинг доирасида ўзбек томони таклифи асосида қўшма лойиҳаларни батафсил муҳокама қилишга аҳдлашиб олинди.